Haxhiu: Institucionet e Kosovës të bashkërendojnë për mbrojtjen e së vërtetës mbi luftën e UÇK-së

Kryetarja e Kuvendit të Kosovës, Albulena Haxhiu, tha se Kuvendi ka miratuar një qëndrim të përbashkët lidhur me deklaratën për aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.

Ajo e cilësoi të drejtë luftën e UÇK-së dhe u shpreh se asnjë vendim gjyqësor nuk mund ta ndryshojë këtë të vërtetë. Haxhiu bëri thirrje që institucionet të hartojnë një strategji të përbashkët juridike e diplomatike, ndërsa theksoi se procesi i apelit është pjesë e rrugës drejt drejtësisë.

Postimi i plotë:

Sot, Kuvendi i Kosovës shprehu një qëndrim të përbashkët përmes Deklaratës lidhur me Aktgjykimin e Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.

Ushtria Çlirimtare e Kosovës ishte rruga përmes së cilës populli ynë luftoi me të drejtë për liri dhe pavarësi. Ajo u krijua si kundërpërgjigje ndaj represionit dhe krimeve të rënda të Serbisë, në kohën kur njerëzit tanë vriteshin, dëboheshin dhe detyroheshin të largoheshin nga shtëpitë e tyre. Asnjë aktgjykim nuk e fshin këtë të vërtetë.

Institucionet e Republikës së Kosovës duhet të veprojnë të bashkuara dhe, përmes një strategjie të përbashkët juridike e diplomatike, të mbrojnë të vërtetën e të përcjellin drejt para botës luftën e popullit tonë për liri.

Procesi i apelit shënon vazhdimin e përpjekjes për drejtësi. Do të jemi së bashku në këtë betejë deri në lirimin e plotë të ish-krerëve të UÇK-së.