Haxhiu: Bashkëpunimi me PDK-në po, koalicioni qeverisës jo

Kryetarja e Kuvendit të Kosovës, Albulena Haxhiu, deklaroi në emisionin “Debat Plus” se nuk e konsideron të nevojshëm krijimin e një koalicioni me Partinë Demokratike të Kosovës (PDK). Sipas saj, palët mund të bashkëpunojnë për çështje të veçanta, por jo si pjesë e një qeverie të përbashkët.

Haxhiu vlerësoi se një qëndrim i unifikuar pas vendimit të 16 shtatorit mund të arrihet edhe pa një marrëveshje koalicioni mes partive.

“Për të pasur një qëndrim unifikues me 16 shtatorin, nuk na duhet një koalicion i përbashkët. Na duhen veprime të përbashkëta, unifikim për secilin veprim që kemi përpara, kontribut nga secila palë”, tha ajo.

Ajo sqaroi se qëndrimi për të mos e parë PDK-në si partnere në qeverisje është pikëpamje e saj personale.

“Por nuk e shoh që na duhet një koalicion me PDK-në, jo në këtë periudhë. Kjo lidhet me vendimin, por me qëndrimin tonë me PDK-në. Mundemi të bashkëpunojmë në raport me kundërshtimin e vendimit të 16 shtatorit, të padrejtë. Mirëpo nuk i shoh si partner në qeverisje. Ky është qëndrimi personal”, u shpreh kryetarja e Kuvendit.

Gjatë intervistës, Haxhiu u ndal edhe te zgjedhja e presidentit, duke përsëritur se kreu i shtetit nuk duhet të jetë anëtar i një partie politike.

“Pra, po rikthehem te qëndrimi: presidenti duhet të jetë president që nuk duhet të jetë në parti politike. Edhe në këtë situatë që jemi, do të ishte më e mira”, deklaroi ajo.

Sipas saj, në diskutime janë shqyrtuar disa kandidatura të mundshme, mes tyre edhe persona që kanë dhënë kontribut në shoqëri dhe në institucionet e Republikës së Kosovës.

“Kemi pasur disa alternativa, për emra që kanë kontribuar në mënyra të ndryshme në shoqërinë tonë, në institucionet e Republikës së Kosovës. Insistimi që të kemi kandidat nga radhët e tyre është i gabuar”, tha Haxhiu.

Ajo solli në vëmendje edhe Glauk Konjufcën, i cili në atë kohë drejtonte Kuvendin, duke treguar se partive u ishte kërkuar të propozonin kandidatë për postin e presidentit.

“Glauk Konjufca tha: ‘Nga LDK-ja e PDK-ja propozoni ju emra, ne i diskutojmë ato, i vlerësojmë dhe ju kthejmë përgjigje’. Nuk ka pasur emra të tillë”, tha Haxhiu.

Haxhiu shtoi se, nëse vlerësimi do të bëhej mbi bazën e mbështetjes që kandidatët kanë marrë në zgjedhje, atëherë duhej të merrej në konsideratë edhe rezultati i Glauk Konjufcës.

“Nëse hyjmë me persona që janë matur në zgjedhje, atëherë Glauk Konjufca ka mbi 200 mijë vota, nuk e di sigurt. Nëse kemi me persona partiakë, atëherë ku e kemi Glauk Konjufcën?”, përfundoi ajo.