Halilaj për bllokimin e Kuvendit: Çështjet e Thaçit, Veselit dhe UÇK-së nuk duhet të kthehen në mjete elektorale

Avokati Gazmend Halilaj ka reaguar për “Bota sot” lidhur me pengesat në konstituimin e Kuvendit, duke vënë në dukje se funksionimi i institucioneve nuk duhet t’u nënshtrohet interesave të partive.

Sipas tij, situata e krijuar nuk mund të shihet vetëm si një konflikt i zakonshëm politik mes subjekteve partiake.

Halilaj ka theksuar se, kur përplasjet politike pengojnë punën e institucioneve, pasojat prekin të gjithë vendin dhe qytetarët. Ai ka shtuar se PDK-ja dhe partitë e tjera opozitare duhet ta kenë të qartë se Kuvendi nuk i përket asnjë force politike dhe nuk mund të përdoret për llogari partiake.

Avokati ka kërkuar që vota e qytetarëve të respektohet dhe procesi i funksionalizimit të institucioneve të përfundojë pa vonesa apo marrëveshje të kushtëzuara.

Një tjetër shqetësim i ngritur prej tij është mundësia që bllokada të jetë pjesë e një plani politik për ta çuar Kosovën drejt zgjedhjeve të reja.

Halilaj ka paralajmëruar se përdorimi i një momenti emocional dhe historik për përfitime politike do të përbënte një qasje të papërgjegjshme ndaj shtetit.

Ai ka nënvizuar veçanërisht se çështjet që lidhen me Hashim Thaçin, Kadri Veselin dhe ish-pjesëtarët e UÇK-së nuk duhet të shërbejnë për kalkulime elektorale. Sipas tij, sakrifica dhe lufta e UÇK-së janë pjesë e historisë së Kosovës dhe nuk mund të shndërrohen në instrument të interesave të një partie.

Gjatë prononcimit, Halilaj është ndalur edhe te rezultati i zgjedhjeve, duke u bërë thirrje partive që kanë qeverisur për vite me radhë ta pranojnë realitetin e ri politik.

Ai ka deklaruar se LVV-ja e ka marrë besimin e qytetarëve dhe se ky vullnet nuk mund të anashkalohet përmes bllokadave, pazareve ose manovrave politike.

Halilaj ka shtuar se, nëse dikush synon ta dobësojë LVV-në apo ta ndryshojë vullnetin e qytetarëve përmes krizës institucionale, përgjigjen duhet ta japin vetë qytetarët në kutinë e votimit.

Avokati ka bërë të ditur se do të vijojë ta mbështesë fuqishëm LVV-në, pasi beson se Kosovës i duhet një politikë e re dhe jo rikthimi i mentalitetit të vjetër të pazareve, posteve dhe interesave partiake.

“Kosova nuk duhet të mbahet peng nga askush. Vullneti i qytetarëve duhet të jetë mbi çdo kalkulim partiak”, ka përfunduar Halilaj për “Bota sot”.