Partia GUXO ka reaguar pas protestave dhe debatit publik të shkaktuar nga dënimet e fundit të Dhomave të Specializuara në Hagë, duke kundërshtuar sulmet politike ndaj zëvendëskryeministres dhe ministres Donika Gërvalla.
Të lidhura
None found
Përmes një komunikate për media, subjekti politik ka vlerësuar se shqetësimi i qytetarëve dhe e drejta për të protestuar janë pjesë e demokracisë, por ka kritikuar përdorimin e tyre për “baltosje politike”.
GUXO thekson se vendimet e Hagës duhet të kundërshtohen dhe të trajtohen në rrugë juridike. Në të njëjtën kohë, sipas partisë, përgjegjësia politike duhet të kërkohet edhe te personat që votuan, negociuan dhe mbështetën themelimin e Gjykatës Speciale.
Në reagimin e saj, partia ka vënë në pikëpyetje arsyet e sulmeve ndaj Donika Gërvallës, duke pyetur nëse ato lidhen vërtet me zhvillimet në Hagë apo me ligjin për hulumtimin e pasurisë së pajustifikueshme.
Komunikata e plotë:
KOMUNIKATË PËR MEDIA
Drejtësi po, manipulim politik jo
Reagimi i qytetarëve ndaj dënimeve të fundit të Dhomave të Specializuara në Hagë është plotësisht i kuptueshëm dhe legjitim. Protesta përbën një të drejtë themelore në një shoqëri demokratike, ndaj zëri i qytetarëve duhet të dëgjohet dhe të respektohet.
Por dënimet drakonike që shkaktuan këtë pakënaqësi të gjerë nuk mund të ndryshohen përmes sulmeve politike e publike. Ato mund të adresohen vetëm përmes një procesi të rregullt juridik. Në këtë drejtim, Gjykata e Apelit, si shkalla e dytë, mbetet rruga e vetme institucionale për trajtimin e këtij problemi.
Asnjë vendim gjyqësor nuk e zhbën drejtësinë e luftës së popullit të Kosovës për liri dhe pavarësi, e cila mbetet e drejtë dhe e shenjtë.
Prandaj, pyetja që duhet shtruar është e qartë: përse përgjegjësia politike nuk kërkohet nga ata që e votuan, e negociuan dhe e përkrahën Gjykatën Speciale? Sot, fushatës së akuzave dhe baltosjeve po i prinë pikërisht ata që, në studio televizive dhe jashtë tyre, kërkonin burgosje, lexonin emra dhe ushtronin presion të jashtëzakonshëm që ky ligj të miratohej në Kuvend.
Është e papranueshme që, në vend të një shqyrtimi të mbështetur në fakte dhe në veprime konkrete për të kuptuar se si u arrit deri te kjo situatë, po synohet që Zëvendëskryeministrja dhe Ministrja Donika Gërvalla të paraqiten politikisht si “fajtore”.
Historikisht, linçimi publik dhe baltosja e skajshme u kanë paraprirë edhe likuidimeve fizike të figurave të njohura kombëtare.
Për këtë arsye, Partia Guxo pyet se nga po vjen rikthimi i fantazmave të listave për likuidime të viteve 97, 98, 99? Këto zhvillime ngrenë dyshime serioze: a po tregohet se në Kosovë ende nuk mund të zhvillohen procese të pavarura gjyqësore pa presion politik dhe ndërhyrje nga jashtë? Çfarë mesazhi u përcillet botës përmes këtyre fushatave dhe protestave kundër institucioneve të drejtësisë?
Shoqëria jonë duhet të vendosë nëse drejtësinë e kërkon vetëm kur ajo i shërben interesave të ngushta politike, apo nëse synon një drejtësi të mbështetur rreptësisht në ligj dhe jo në kërkesat e grupeve që e trajtojnë ligjin si pronë të tyre.
Partia Guxo është e bindur se drejtësia nuk duhet të shndërrohet asnjëherë në mjet të përplasjeve të brendshme politike.
Në fund, duhet të shtrohet edhe një pyetje tjetër: a lidhen sulmet ndaj Donikës me Hagën apo me ligjin për hulumtimin e pasurisë së pajustifikueshme? Ofendimet e publikuara sot në portale dëshmojnë se përgjigjja është kjo e dyta.
Prandaj:
Shqetësim qytetar, po.
Protestë, po.
Llogaridhënie, po.
Linçim politik, në asnjë mënyrë.
