Dyshohet për pastrim të parave të drogës në Itali, ja kush është personi të cilit iu sekuestruan prona në Kosovë

Nën autorizimin e Prokurorisë Speciale të Republikës së Kosovës, Policia e Kosovës zhvilloi më 30 qershor 2026 një operacion në Prishtinë, gjatë të cilit u sekuestruan asete në vlerë prej 1 milion euro.

Aksioni u krye në kuadër të një hetimi për pastrimin ndërkombëtar të të ardhurave të siguruara nga trafikimi i drogës. Ky hetim po zhvillohet nga autoritetet italiane dhe franceze, të koordinuara nga Europol dhe Eurojust, në bashkëpunim të ngushtë me Prokurorinë Speciale dhe Policinë e Kosovës, shkruan insjaderi.

Sipas medias, duke iu referuar burimeve nga brenda operacionit, njëri prej të arrestuarve është Dohan Hasani.

Ky operacion është vazhdim i një hetimi të gjerë, i cili në shtator 2025 kishte rezultuar me ngrirjen e aseteve që kalonin vlerën e 30 milionë eurove.

Në fokus të aksionit ishin dy shtetas të Kosovës që jetonin në provincën e Alessandrias. Të dy, të cilët prej kohësh ishin nën vëzhgimin e prokurorëve italianë, u arrestuan në Francë shtatorin e kaluar pasi u ndaluan teksa udhëtonin me veturë. Gjatë kontrollit, oficerët zbuluan në pjesën e poshtme të automjetit mbi 50 kilogramë lingota ari me cilësi të lartë. Pas analizimit të dokumenteve të sekuestruara dhe shkëmbimit të informacionit gjyqësor me autoritetet kosovare, Guardia di Finanza arriti të identifikojë dhe të vulosë kasafortën e huaj të çiftit, ku përfshiheshin llogari bankare, biznese, pasuri të paluajtshme dhe automjete luksoze.

Verifikimet mbi pasurinë zbuluan një mekanizëm të ndërlikuar të pastrimit të parave. Brenda vetëm dhjetë muajve, organizata kishte arritur të grumbullonte të paktën 18 milionë euro nga fitimet e trafikut të drogës në Francë. Paratë cash ruheshin gradualisht në banesën e dy të dyshuarve në Aleksandri dhe më pas shndërroheshin në shufra dhe fletë ari. Kjo fazë kyçe u bë e mundur përmes bashkëpunimit me operatorë të specializuar në shkrirjen dhe përpunimin e metaleve të çmuara, të vendosur në të gjithë Lombardinë dhe Piemonte.

Kthimi i parave cash në ar kishte për qëllim të vështirësonte gjurmimin e burimit të fondeve të paligjshme dhe njëkohësisht ta bënte më të sigurt transportimin e kapitalit jashtë vendit, me dërgesa që shkonin jo vetëm drejt Kosovës, por edhe drejt Turqisë dhe Marokut.