Çështja Thaçi dhe të tjerët, më 10, 11 dhe 14 shtator mbahen deklaratat përmbyllëse për akuzat për administrim të drejtësisë

Gjykata Speciale do të zhvillojë deklaratat përmbyllëse në çështjen ndaj Hashim Thaçit dhe të tjerëve, e cila lidhet me akuzat për administrim të drejtësisë.

Dhomat e Specializuara të Kosovës njoftuan se Gjykatësi i Vetëm ka përcaktuar që deklaratat përfundimtare në rastin “Prokurorja e Specializuar kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit” të mbahen më 10, 11 dhe 14 shtator 2026. Seancat do të nisin në orën 09:30.

Me zhvillimin e këtyre deklaratave përmbyllet paraqitja e argumenteve nga palët në këtë proces gjyqësor. Pas kësaj, Gjykatësi i Vetëm do të marrë vendimin për çështjen.

Dokumentet e Zyrës së Prokurorit të Specializuar bëjnë të ditur se veprat penale të përfshira në aktakuzë lidhen me procedurat zyrtare të Dhomave të Specializuara, ndër to edhe me hetimet e Zyrës së Prokurorit të Specializuar.

Sipas aktakuzës, të paktën gjatë periudhës nga 12 prilli 2023 deri më 2 nëntor 2023, Thaçi nxori informacione konfidenciale që i ishin bërë të ditura gjatë gjykimit të tij. Prokuroria pretendon gjithashtu se ai, së bashku me Fadil Fazliun, Bashkim Smakajn, Isni Kilajn dhe Hajredin Kuçin, u koordinuan për të ndikuar në mënyrë të paligjshme mbi dëshmitë e dëshmitarëve të Zyrës së Prokurorit të Specializuar në çështjen Thaçi dhe të tjerët.