Byroja për pasurinë e pajustifikueshme rikthehet në Kuvend, Musliu: Përballë saj qëndron vullneti politik

Qeveria e Kosovës ka miratuar Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Nisma ligjore synon krijimin e kësaj Byroje, përcaktimin e kompetencave të saj dhe rregullimin e procedurave për kontrollin dhe konfiskimin e pasurisë së pajustifikueshme.

Ministrja e Drejtësisë, Donika Gërvalla, njoftoi në një konferencë për media se projektligji tashmë do t’i përcillet Kuvendit të Kosovës.

Kjo lëvizje e rikthen në qendër të vëmendjes rrugëtimin parlamentar të projektligjit, i cili kishte kaluar leximin e parë në Kuvend në prill të këtij viti. Pas miratimit nga Qeveria, nisma duhet të kalojë sërish nëpër hapat e përcaktuar institucionalë, ndërsa mbetet e hapur edhe çështja e ndikimit të vullnetit politik të partive në përmbylljen e procesit.

Për këtë situatë ka folur për “Bota sot” juristi nga Belgjika, Skënder Musliu. Sipas tij, procedurat juridike janë të qarta, ndërsa pengesa më e madhe mund të lidhet me qëndrimet politike të subjekteve parlamentare.

Musliu kujton se Ligji për Vettingun dhe Ligji për Byronë e Konfiskimit të Pasurisë së Pajustifikueshme kanë qenë pjesë e reformave në drejtësi të paralajmëruara nga Lëvizja Vetëvendosje.

“Me ardhjen e LVV-së dhe Albin Kurtit në pushtet, ashtu siç ishte premtuar gjatë fushatave zgjedhore parlamentare, Ministria e Drejtësisë nisi përgatitjen e infrastrukturës juridike për reformat e paralajmëruara në drejtësi. Në mesin e ligjeve më të rëndësishme ishin Ligji për Vettingun dhe Ligji i Byros për konfiskimin e pasurisë së pajustifikueshme.

Synimi i këtyre dy ligjeve ishte reformimi i sistemit të drejtësisë, përfshirë ‘skanimin’ e gjyqtarëve dhe prokurorëve për të verifikuar profesionalizmin, integritetin, kredibilitetin profesional dhe pasurinë e tyre, si dhe forcimi i luftës ndaj korrupsionit dhe krimit të organizuar të zyrtarëve publikë”, ka deklaruar ai.

Juristi e lidh krijimin e këtij mekanizmi me nevojën për të luftuar korrupsionin dhe pasurinë e pajustifikueshme. Ai pretendon se një pjesë e zyrtarëve publikë e kanë përdorur pozitën për përfitime të paligjshme.

“Për dy dekada, një pjesë e tyre, në kohën kur opozita ishte në pushtet, kishin lidhje të ngushta me politikanë të rangut të lartë, të cilët ishin të paprekshëm dhe të pandëshkueshëm. Sipas tij, bashkëpunimi në korrupsion dhe krim të organizuar bëri që këta zyrtarë të keqpërdornin pozitën dhe autoritetin, duke u pasuruar në mënyrë të jashtëzakonshme në kurriz të qytetarëve dhe në dëm të shtetit.

Pikërisht për t’u dhënë fund këtyre keqpërdorimeve dhe vjedhjeve masive, Ministria e Drejtësisë përgatiti Ligjin e Byros për konfiskimin e pasurisë së pajustifikueshme”, është shprehur Musliu.

Ai ka kritikuar opozitën, duke e akuzuar për vonesa në miratimin e ligjit. Sipas Musliut, projektligji është përballur më herët me procedura në Kuvend, në Gjykatën Kushtetuese dhe në Komisionin e Venedikut, si dhe me shqyrtim publik.

“Qeveria Kurti e kishte përgatitur dhe dërguar me kohë këtë ligj në Kuvend për shqyrtim e miratim, por ai hasi në rezistencën e PLAN-it. Për ta bllokuar miratimin, sipas tij, ligji u rikthye disa herë në Kuvend, në Gjykatën Kushtetuese dhe në Komisionin e Venedikut, ndërsa iu nënshtrua edhe shqyrtimit publik, duke shkaktuar pengesa dhe vonesa të qëllimshme”, ka thënë ai.

Sipas Musliut, pas konstituimit të Kuvendit dhe formimit të Qeverisë, projektligji ka hyrë në një fazë të re të shqyrtimit.

“Ditë më parë, pas konstituimit të Kuvendit dhe formimit të Qeverisë, kjo e fundit ia përcolli Kuvendit të Kosovës Ligjin e Byros për konfiskimin e pasurisë së pajustifikueshme. Për këtë çështje, procedurat e miratimit janë të përcaktuara qartë si nga ligji, ashtu edhe nga Rregullorja e Punës së Kuvendit”, ka deklaruar juristi.

Ai ka shpjeguar se Ministria e Drejtësisë, si institucion përgjegjës, ia paraqet projektligjin Qeverisë për miratim. Pas miratimit ekzekutiv, dokumenti dërgohet në Kuvend, ku shqyrtohet fillimisht nga komisioni përkatës dhe më pas u përcillet deputetëve për diskutim e votim në seancë plenare.

Duke qenë se projektligji kishte kaluar leximin e parë në prill të këtij viti, Musliu nuk pret pengesa të natyrës procedurale. Ai mendon se sfida kryesore do të jetë politike.

“Kalimi i Projektligjit të Byros për konfiskimin e pasurisë së pajustifikueshme në lexim të parë, në prill të këtij viti, tregon se nga ana ligjore nuk ka ndonjë problem të veçantë për miratimin e tij. Sipas tij, pengesa e vetme lidhet me drejtuesit e partive opozitare, të cilët që prej fillimit të mandatit të kryeministrit Kurti janë sjellë në mënyrë destruktive dhe arrogante, duke kundërshtuar ligjet më të rëndësishme për interesat e shtetit”, është shprehur Musliu.

Ai vlerëson se përfundimi i procesit do të varet nga gatishmëria e partive për ta mbështetur nismën në Kuvend. Në këtë kuadër, Musliu pretendon se opozita ka zvarritur për pesë vite si Ligjin për Vettingun, ashtu edhe Byronë për konfiskimin e pasurisë së pajustifikueshme.

“Për fat të keq, miratimi i këtij ligji dhe i nismave të tjera varet nga inatet dhe egot primitive të lidershipit opozitar. Këtë e dëshmon fakti se opozita ka pesë vite që po e shtyn miratimin e Ligjit për Vettingun dhe të Byros për konfiskimin e pasurisë së pajustifikueshme”, ka thënë ai.

Musliu beson se zvarritja synon t’u mundësojë zyrtarëve të përfshirë në korrupsion dhe krim të organizuar t’i shmangen përgjegjësisë. Sipas tij, reformat në drejtësi do të sillnin një periudhë të re llogaridhënieje dhe do t’i jepnin fund pandëshkueshmërisë.

Megjithatë, ai sqaron se Byroja nuk do të ketë kompetencë të marrë vendimin përfundimtar për konfiskimin e pasurisë. Roli i saj do të ishte hetimi dhe verifikimi i pasurisë së pajustifikueshme, ndërsa vendimi do t’i takonte gjykatës kompetente.

“Ky ligj parashikon ngritjen e një mekanizmi shtetëror që do të hetojë dhe verifikojë pasurinë e pajustifikueshme. Vendimin për konfiskim, mbi bazën e provave, e merr gjykata kompetente dhe jo Byroja, siç është pretenduar në propagandën e opozitës”, ka theksuar juristi.

Në përfundim, Musliu thotë se zbatimi i ligjit do t’i shtynte zyrtarët publikë të ishin më të kujdesshëm dhe më përgjegjës gjatë ushtrimit të detyrës. Pasuria e tyre, sipas tij, duhet të përputhet me të ardhurat e ligjshme dhe jo të jetë rezultat i korrupsionit.