Vullnet Bugaqku, ekspert i çështjeve ligjore në Institutin Demokratik të Kosovës, ka paralajmëruar se Kuvendi mund të shkelë Rregulloren e punës dhe rrjedhimisht Kushtetutën, nëse projektligji për ndryshimin e Ligjit për Dhomat e Specializuara miratohet në lexim të dytë pa u përmbushur afati minimal prej 72 orësh nga miratimi i tij në lexim të parë.
Të lidhura
None found
“Sipas kësaj rregulloreje, nga momenti kur ligji miratohet në lexim të parë deri në votimin e tij në lexim të dytë duhet të kalojnë të paktën 72 orë”, deklaroi Bugaqku për Radion Evropa e Lirë.
Ai sqaroi se ky kufizim kohor mund të anashkalohet vetëm kur vendi ndodhet në gjendje të jashtëzakonshme ose kur është shpallur gjendje emergjente.
Eksperti i IKD-së iu referua edhe një vendimi të Gjykatës Kushtetuese të dhjetorit të vitit 2024, e cila kishte gjetur shkelje kushtetuese dhe kishte shfuqizuar 12 ligje për shkak të mosrespektimit të procedurave dhe afateve gjatë miratimit të tyre.
Nëse ndryshimet për Dhomat e Specializuara votohen pa përfunduar 72 orët, rasti mund të dërgohet për shqyrtim në Gjykatën Kushtetuese. Kërkesën për një procedurë të tillë mund ta paraqesin të paktën dhjetë deputetë, presidenti ose Qeveria.
Projektligji kaloi në lexim të parë të hënën, ndërsa Partia Demokratike e Kosovës ka kërkuar që shqyrtimi dhe votimi i tij në lexim të dytë të zhvillohen po atë ditë.
