Shefi i misionit të EULEX-it në Kosovë, Giovanni Pietro Barbano, deklaron se në diskutimet për krijimin e xhandarmërisë, të paralajmëruar nga kryeministri në detyrë Albin Kurti, duhet të merret në konsideratë korniza ligjore e përcaktuar nga Kushtetuta, e cila e njeh Policinë e Kosovës si institucionin kryesor dhe të vetëm për zbatimin e ligjit.
Sipas Barbanos, në këtë fazë informacionet në dispozicion janë të pakta, pasi veprimet e ndërmarra deri tani për themelimin e një xhandarmërie ndodhen ende në hapat fillestarë.
Të lidhura
None found
“Natyrisht, ne respektojmë pronësinë vendore të procesit, por duhet të kemi parasysh edhe kornizën ligjore që përcaktohet nga Kushtetuta, e cila e konsideron Policinë e Kosovës si institucionin kryesor dhe të vetëm për zbatimin e ligjit. Prandaj, çfarëdo zgjidhjeje që do të gjendet për këtë projekt duhet ta respektojë këtë kornizë ligjore, si dhe kufizimet e tjera të përcaktuara nga marrëveshje dhe aranzhime të ndryshme. Ne jemi të gatshëm t’i monitorojmë këto zhvillime. Misioni mbetet i angazhuar ngushtë në përcjelljen e kësaj çështjeje dhe, nëse kërkohet, të ofrojë këshilla dhe ekspertizë”, thotë Barbano në intervistën për KosovaPress.
Ai shton më tej se ekziston tashmë një bashkërendim i konsoliduar ndërmjet Policisë së Kosovës, KFOR-it dhe EULEX-it, ndërsa nënvizon se, në rast se krijohet një strukturë e re si xhandarmëria, do të jetë thelbësore që ajo të përfshihet në të njëjtin mekanizëm koordinimi.
“Sërish, ne tashmë kemi një mekanizëm koordinimi shumë të mirëprovuar ndërmjet Policisë së Kosovës, KFOR-it dhe EULEX-it në fusha të ndryshme të mandateve tona, me trajnime të përbashkëta dhe takime periodike. Prandaj, nëse krijohet një aktor i ri, do të jetë jashtëzakonisht e rëndësishme që ai të integrohet në të njëjtin mekanizëm koordinimi”, tha Barbano.
