Në zyrat e Qendrës së Lëvizjes VETËVENDOSJE! në Gjilan u zhvillua dje një takim i përbashkët, ku morën pjesë drejtuesit e të gjitha qendrave të lëvizjes në Kosovë. Në mbledhje ishin të pranishëm kryetari i LVV-së dhe njëherësh kryeministri i republikës, Albin Kurti, sekretari organizativ Alim Rama dhe koordinatori i qendrave, Salih Zyba.
Të lidhura
None found
Diskutimet u përqendruan te zhvillimet e fundit politike, veçanërisht te procesi i konsolidimit të institucioneve.
Një pjesë e takimit iu kushtua edhe organizimit të brendshëm të lëvizjes. U trajtuan forcimi i strukturave në terren, zgjedhjet e brendshme, funksionimi i organizimit në bazë, planifikimi i aktiviteteve dhe shtimi i angazhimit në çdo lagje e fshat.
Takimi u mbajt në një datë të rëndësishme për Lëvizjen VETËVENDOSJE!, pasi u shënua 21-vjetori i themelimit të qendrës së parë të saj, Qendrës së Gjilanit. Pas mbledhjes, përvjetori u shënua edhe me një koktej rasti.
“21 vjet organizim, aktivizëm dhe përkushtim në shërbim të qytetarëve. Një rrugëtim që vazhdon edhe me më shumë punë e përkushtim për republikën tonë”, thuhet në njoftimin e partisë.
