Aktakuzë në Pejë: Dy persona dyshohet se përfituan 134 mijë e 761 euro me premtimin për transplantim veshke në Turqi

Prokuroria Themelore në Pejë ka ngritur aktakuzë ndaj V.H. dhe A.K., të cilët dyshohen se i kanë marrë një personi 134 mijë e 761 euro, duke i premtuar se do t’i siguronin transplantim të veshkës në një spital në Turqi.

Njëri prej të dyshuarve është recidivist dhe, sipas të dhënave të publikuara nga media, bëhet fjalë për Valmir Hajrullahun.

Sipas aktakuzës, V.H. gjatë periudhës 26 maj 2021 deri më 29 shtator 2023, në fshatin Lubeniq të Pejës, është prezantuar rrejshëm si mjek në specializim në një spital turk.

Ai dyshohet se i ka premtuar të dëmtuarit se do t’ia mundësonte kryerjen e transplantimit të veshkës, ndërsa për këtë qëllim i ka kërkuar dhe marrë shuma të ndryshme parash.

Paratë, sipas pretendimeve të Prokurorisë, janë kërkuar kinse për shpenzimet spitalore dhe procedurat që ndërlidhen me transplantimin.

“Me qëllim të përfitimit të kundërligjshëm të dobisë pasurore, dyshohet se e ka mashtruar të dëmtuarin, duke e vënë dhe mbajtur atë në lajthim përmes paraqitjes së rreme të fakteve”, thuhet në njoftimin e Prokurorisë Themelore në Pejë.

Prokuroria pretendon gjithashtu se V.H. ka përdorur të dhëna, dokumente dhe emra të mjekëve të një spitali në Turqi, duke synuar të krijonte te i dëmtuari bindjen se ndërhyrja do të kryhej.

Si rezultat i këtyre veprimeve, dëmi material i shkaktuar të dëmtuarit arrin në 134 mijë e 761 euro.

Në rast dyshohet se ka ndihmuar edhe A.K. Sipas Prokurorisë, ai e ka lidhur të dëmtuarin me V.H.-në dhe këtë të fundit e ka prezantuar në mënyrë të rreme si mjek në Turqi, duke i forcuar viktimës besimin në aftësitë dhe mundësitë e tij për organizimin e transplantimit.

“Për personin tjetër të përfshirë në rast, i cili sipas aktakuzës dyshohet se është paraqitur si dhurues i veshkës, procedura penale është veçuar”, njofton Prokuroria.

Institucioni i akuzës në Pejë vlerëson se veprimet e të pandehurve përmbushin elementet e veprave penale për të cilat ata akuzohen.

Pas ngritjes së aktakuzës, prokurori i çështjes i ka kërkuar gjykatës që të dy të pandehurit t’i shpallë fajtorë dhe t’i dënojë në përputhje me ligjin.

Megjithatë, të pandehurit do të konsiderohen të pafajshëm deri në marrjen e një vendimi përfundimtar nga gjykata.