Aktakuzë ndaj R.K. dhe një personi juridik për keqpërdorim në prokurim, mashtrim dhe falsifikim dokumenti

Departamenti për Krime të Rënda i Prokurorisë Themelore në Pejë ka bërë të ditur se ka ngritur aktakuzë ndaj të pandehurit R.K. dhe një personi juridik. Ata dyshohen për veprën penale “Keqpërdorimi dhe mashtrimi në prokurim publik”, ndërsa R.K. ngarkohet edhe me veprën “Falsifikimi i dokumentit”.

Sipas aktakuzës, R.K., si pronar dhe përfaqësues i autorizuar i një operatori ekonomik, dyshohet se ka dorëzuar dhe përdorur dokumente të rreme dhe të paautorizuara gjatë një procedure të prokurimit publik. Procedura ishte zhvilluar nga Spitali i Përgjithshëm në Pejë dhe kishte të bënte me furnizimin me libra të protokollit.

Prokuroria njoftoi se dokumentacioni i dorëzuar dyshohet se përmbante një CV, një kontratë pune dhe një certifikatë universitare të lëshuara në emër të një personi tjetër. Këto dokumente pretendohet se janë përdorur pa dijeninë dhe miratimin e personit përkatës, me synimin për të ndikuar te vendimi i autoritetit kontraktues dhe për të siguruar kontratën.

R.K. dyshohet gjithashtu se ka hartuar një dokument të falsifikuar, konkretisht një kontratë pune, në mënyrë që ajo të përdorej si dokument origjinal brenda procedurës së prokurimit publik.

Edhe personi juridik dyshohet se, gjatë pjesëmarrjes në këtë procedurë prokurimi, ka paraqitur dhe shfrytëzuar dokumentacion të rremë e të paautorizuar, me qëllim ndikimin në vendimmarrjen e autoritetit kontraktues dhe fitimin e kontratës.

Në bazë të këtyre veprimeve, aktakuza pretendon se ekziston dyshim i bazuar mirë që R.K. ka kryer veprat penale “Keqpërdorimi dhe mashtrimi në prokurim publik” dhe “Falsifikimi i dokumentit”. Ndërkohë, personi juridik akuzohet për veprën penale “Keqpërdorimi dhe mashtrimi në prokurim publik”.

Me paraqitjen e aktakuzës, prokurorja e çështjes i ka kërkuar gjykatës që të pandehurit të shpallen fajtorë dhe të marrin dënimin e parashikuar me ligj për veprat penale që u ngarkohen.