Kryetari i Lidhjes Demokratike të Kosovës, Lumir Abdixhiku, ka kërkuar hetim të plotë e të pavarur për mënyrën se si institucionet e trajtuan rastin e Arlinda Zekajt, e cila u vra në Vitomiricë të Pejës. Ai kërkon që të shqyrtohen si veprimet, ashtu edhe mosveprimet e tyre.
Sipas Abdixhikut, Arlinda i ishte drejtuar shtetit për mbrojtje dhe, tri ditë para vrasjes, e kishte njoftuar Prokurorinë se jeta e saj ishte në rrezik. Letra e saj, tashmë e bërë publike, tregon se ajo kishte kërkuar ndihmë dhe kishte paralajmëruar se përgjegjësit nuk duhej të prisnin deri pas vdekjes së saj për të dhënë llogari.
Të lidhura
None found
Abdixhiku tha se leximi i fjalëve të një gruaje që kërkon ndihmë, ndërsa ndihet e pafuqishme, është i padurueshëm. Sipas tij, mesazhi prek secilin, qoftë prind, vëlla, fëmijë apo bashkëqytetar.
Kreu i LDK-së kërkoi që çdo zyrtar dhe institucion i përfshirë në trajtimin e kërkesës së Arlindës të përgjigjet për atë që ka bërë dhe për detyrimet e lëna pa përmbushur. Ai nënvizoi se përgjegjësia duhet t’i atribuohet personave konkretë.
Abdixhiku shprehu ngushëllime për familjen e viktimës, duke thënë se Arlindës duhej t’i ishte siguruar mbrojtje sa ishte gjallë. Tani, theksoi ai, asaj i detyrohen drejtësi.
Vrasja ka shkaktuar reagime të shumta në publik dhe thirrje për llogaridhënie nga institucionet.
Policia e Kosovës bëri të ditur se rasti fillimisht ishte raportuar si dhunë në familje dhe se Arlinda ishte intervistuar në stacionin policor në Pejë. Më pas, policia mori njoftimin se ajo ishte gjetur e pajetë në shtëpinë e saj, në Vitomiricë.
Të dhënat paraprake të policisë sugjerojnë se vdekja mund të jetë shkaktuar nga goditje me një mjet të fortë. I dyshuari, që dyshohet të jetë kunati i saj, është në arrati. Hetimet për zbardhjen e plotë të ngjarjes vazhdojnë.
