Protesta qytetare në Divjakë ka hyrë sot në ditën e saj të 30-të. Banorët kundërshtojnë reformën administrative territoriale të propozuar nga PS, e cila parashikon eliminimin e Divjakës dhe bashkimin e saj me Lushnjën.
Pavarësisht presioneve të vazhdueshme, që gjatë ditëve të fundit janë intensifikuar, banorët e Divjakës vijojnë të qëndrojnë në protestë.
Të lidhura
None found
“Tridhjetë ditë rezistencë tregojnë vullnetin e qytetarëve të Divjakës për të mos u tërhequr dhe për t’i thënë jo vendimit të papranueshëm të qeverisë. Do të ishte turp për ne të lejonim bashkimin me Lushnjën”, u shpreh një prej protestuesve.
Ndërkohë, numri i pjesëmarrësve në protestë ka ardhur në rënie. Një protestuese me aftësi të kufizuara, e cila ka qenë pjesë e qëndresës që prej ditës së parë, ka deklaruar se ndaj saj dhe protestuesve të tjerë janë ushtruar presione për të mos marrë pjesë, në të kundërt do t’u hiqet KEMPI.
Protesta e ditës së 30-të përfundoi me një marshim në rrugët e qytetit. Gjatë marshimit, protestuesit kërkuan edhe dorëheqjen sa më të shpejtë të kryetarit të bashkisë, Josif Gorrea. Sipas tyre, ai nuk është shfaqur më në shesh pas ditës së parë të protestës dhe ushtron presion për të penguar pjesëmarrjen e banorëve.
