Morina me fluks të lartë, mbi 52 mijë shtetas të Kosovës hyjnë në Shqipëri brenda 24 orëve

Edhe në fundjavën e fundit të gushtit, pika kufitare e Morines vijon të përballet me një numër të madh udhëtarësh.

Shumë pushues po përfitojnë nga temperaturat e përshtatshme për të kaluar ditët e mbetura të verës në bregdetin shqiptar, ndonëse për një pjesë të tyre kjo është vizita e radhës gjatë këtij sezoni.

Gjatë 24 orëve të fundit, në territorin e Shqipërisë kanë hyrë 52 mijë e 864 shtetas dhe 13 mijë e 531 automjete. Në të njëjtën kohë, vendin e kanë lënë 35 mijë e 72 shtetas, së bashku me 11 mijë e 238 automjete.

Numrat mbeten të lartë edhe po të shqyrtohet periudha pesëditore. Nga 24 deri më 28 gusht, nëpërmjet Morines kanë hyrë 152 mijë e 694 shtetas dhe 46 mijë e 870 automjete, ndërsa në dalje janë evidentuar 121 mijë e 846 shtetas dhe 37 mijë e 148 automjete.

Morina vazhdon të jetë një prej pikave kryesore të qarkullimit ndërmjet Kosovës dhe Shqipërisë. Autoritetet po vijojnë masat për administrimin e fluksit, me synim shmangien e radhëve dhe përshpejtimin e lëvizjes së udhëtarëve.