Një krizë e re ka përfshirë marrëdhëniet mes SHBA-së dhe Kanadasë, pasi përpjekjet për arritjen e një marrëveshjeje të re tregtare përfunduan pa sukses, duke thelluar tensionet dypalëshe.
Të lidhura
None found
Tërheqja e palës kanadeze solli ndërprerjen e negociatave dhe krijoi terrenin për një valë të re tarifash nga të dyja vendet. Vlera e tregtisë dypalëshe mes SHBA-së dhe Kanadasë arrin në rreth 872 miliardë dollarë në vit.
Përplasjet mes dy aleatëve kanë një histori të mëparshme. Gjatë viteve të fundit, Donald Trump e ka kritikuar vazhdimisht Kanadanë për qasjen e saj tregtare dhe nivelin e kontributit në mbrojtjen rajonale. Në të kaluarën, ai e ka quajtur vendin edhe “Shteti i 51-të” i SHBA-së.
Situata u acarua edhe më shumë me daljen në publik të një regjistrimi audio, në të cilin zëvendëspresidenti amerikan, JD Vance, fliste për kryeministrin kanadez Mark Carney. Ai e cilësoi Carney-n si një “djalë shumë të ëmbël”, ndërsa ironizoi pohimet e tij se do të përballej me Donald Trump.
Deklaratat e Vance nxitën reagime në Kanada, ndërkohë që konflikti i fundit po konsiderohet një provë për strategjinë tregtare të administratës Trump.
Ndonëse Kanadaja mbetet një partnere e rëndësishme tregtare për administratën Trump, Uashingtoni kërkon prej saj më shumë lëshime në aspektin ekonomik dhe një përfshirje më të madhe në çështjet e sigurisë.
Zhvillimet e fundit dëshmojnë se presioni i SHBA-së nuk e ka detyruar Kanadanë të tërhiqet. Kjo situatë ngre pikëpyetje mbi drejtimin që do të marrin raportet mes dy aleatëve gjatë pjesës së mbetur të presidencës së Trump.
