Administrata e presidentit Donald Trump ka vendosur ta heqë Sirinë nga lista amerikane e vendeve që sponsorizojnë terrorizmin, 47 vjet pasi ajo ishte përfshirë në të. Ky hap synon të lehtësojë investimet dhe të mbështesë rikthimin e Sirisë në ekonominë globale.
Të lidhura
None found
Sekretari amerikan i Shtetit, Marco Rubio, deklaroi se vendimi pasqyron masat e marra nga qeveria e re siriane për t’u shkëputur nga terrorizmi ndërkombëtar.
Ndryshimi përfaqëson një kthesë të rëndësishme në qasjen e Uashingtonit ndaj Damaskut. Gjatë administratës Trump janë përmirësuar marrëdhëniet me presidentin e ri të Sirisë, Ahmed al-Sharaa, i cili në të kaluarën kishte lidhje me grupin xhihadist al-Kaeda.
Ndërkohë, edhe Hayat Tahrir al-Sham (HTS), organizata që drejtoi ofensivën e cila rrëzoi Bashar al-Assad në fund të vitit 2024, është hequr nga listat amerikane të organizatave terroriste. HTS njihej më herët si Fronti al-Nusra dhe kishte shërbyer si dega siriane e al-Kaedës. Sharaa i ndërpreu marrëdhëniet me këtë rrjet xhihadist në vitin 2016.
Heqja e Sirisë nga lista amerikane pritet të zbusë disa nga pengesat kryesore që kanë kufizuar investimet dhe veprimtarinë ekonomike në vend.
Rubio e përshkroi vendimin si një “rrugë drejt prosperitetit” për popullin sirian. Sekretari amerikan i Thesarit, Scott Bessent, tha se masa mund të tërheqë investime të reja dhe të ndihmojë stabilitetin politik e ekonomik. Ministri i Jashtëm sirian, Asaad Hassan al-Shaibani, e cilësoi atë një “hap historik” dhe tha se qeveria do të angazhohet për të kapërcyer pasojat e izolimit të Sirisë.
Siria u përfshi në listën amerikane të shteteve sponsorizuese të terrorizmit në vitin 1979. Pas largimit të saj, në këtë listë mbeten Kuba, Koreja e Veriut dhe Irani.
Statusi i një shteti sponsorizues të terrorizmit shoqërohet me kufizime të rënda financiare, duke përfshirë pengimin e ndihmës amerikane, eksporteve dhe shitjeve të pajisjeve të mbrojtjes. Ky përcaktim mund të sjellë pasoja edhe për kompani e shtete të tjera që kryejnë transaksione me vendin e sanksionuar.
Pavarësisht vendimit të ri të SHBA-së, Siria vijon të përballet me vështirësi të mëdha politike dhe të sigurisë. Qeveria e re ende nuk ka ndërtuar një sistem plotësisht përfaqësues, ndërsa tensionet me fqinjët, përfshirë Izraelin dhe Turqinë, mbeten të larta.
Uashingtoni synon që Siria e re të afrohet me Perëndimin dhe të qëndrojë jashtë orbitës së Rusisë dhe Kinës.
