Ministri amerikan i Transportit, Sean Duffy, deklaroi të hënën se Kanadaja nuk ka mundësi të përballojë një luftë tregtare me Shtetet e Bashkuara, pasi një përplasje e tillë do të sillte pasoja “katastrofike” për vendin. Ai tha gjithashtu se beson që kryeministri Mark Carney do të rikthehet së shpejti në tryezën e bisedimeve.
Të lidhura
None found
Qeveria kanadeze ka paralajmëruar se nga 8 shtatori do të aplikojë masa kundërpërgjigjëse ndaj çelikut dhe produkteve amerikane të qumështit. Vendimi erdhi pasi Carney hodhi poshtë një “marrëveshje të keqe tregtare” të propozuar nga Uashingtoni.
Duke folur për Fox News, Duffy theksoi se të dyja vendet janë partnerë të rëndësishëm tregtarë, por sipas tij, Kanadaja përfiton më shumë nga marrëdhëniet tregtare me SHBA-në sesa përfiton Uashingtoni nga tregtia me Kanadanë.
“Të mendosh se Kanadaja mund të hyjë në luftë me Donald Trump dhe të dalë fituese përballë Shteteve të Bashkuara është marrëzi”, u shpreh ai.
Sekretari amerikan i Transportit shtoi se pret që Mark Carney të rikthehet shpejt në negociata, pasi një konflikt tregtar do të kishte pasoja katastrofike për Kanadanë.
Tarifat e reja kanadeze do të prekin, mes sektorëve të tjerë, industrinë amerikane të çelikut dhe atë të produkteve të qumështit. Ato përbëjnë kundërpërgjigjen e Otavës ndaj tarifave shtesë amerikane prej 50%, të cilat hynë në fuqi dje dhe ndikojnë në 5.5% të eksporteve kanadeze drejt Shteteve të Bashkuara.
Pas disa javësh negociatash, kryeministri kanadez njoftoi të premten në mbrëmje se bisedimet do të përfundonin, pak para skadimit të ultimatumit të Shtëpisë së Bardhë për tarifat.
“Kur sulmohesh, je në luftë. Ne u sulmuam”, deklaroi Carney, duke argumentuar se Shtetet e Bashkuara “kërkuan shumë dhe ofruan shumë pak”.
