Një manastir budist në fshatin Swel Le Oh, në rajonin Sagaing të Myanmarit qendror, është goditur nga një avion luftarak i ushtrisë, në një kohë kur aty ndodheshin më shumë se 100 persona për një tërheqje meditimi.
Të lidhura
None found
Bilanci i sulmit është të paktën 14 civilë të vrarë dhe rreth 20 të plagosur. Sipas Organizatës së Mbrojtjes Civile dhe Sigurisë së Qarkut Myaung, në mesin e viktimave janë 11 burra dhe tre gra.
Manastiri ndodhet rreth 75 kilometra në perëndim të Mandalay, qytetit të dytë më të madh të Myanmarit. Bombardimi u krye rreth orës 09:00, gjatë periudhës së Kreshmës Budiste.
Një banor i zonës, i cituar nga Associated Press, deklaroi se avioni lëshoi dy bomba, me një diferencë prej rreth 15 minutash. Njëra prej tyre ra në kompleksin e manastirit, ndërsa tjetra goditi një shtëpi pranë tij. Në atë zonë po zhvillohej një tërheqje meditimi njëjavore, ku merrnin pjesë më shumë se 100 persona.
“Pesë nga të vrarët ishin nga fshati ynë dhe nëntë të tjerët nga fshatrat përreth”, tha për AFP-në një luftëtar vendas.
Një tjetër pjesëtar i rezistencës tha se shumica e viktimave ishin persona të moshës 50 deri në 70 vjeç.
“Nuk ishte një rast i shënjestrimit të gabuar. Ata sulmuan qëllimisht një manastir”, u shpreh ai.
Ushtria e Myanmarit nuk ka dhënë ende një koment për ngjarjen. Junta ushtarake ka deklaruar më herët se sulmet e saj synojnë vetëm objektiva ushtarake, ndërsa forcat e rezistencës i ka akuzuar për përdorimin e civilëve si mburojë.
Ngjarja u regjistrua vetëm pak ditë pas publikimit të një raporti të ri nga Mekanizmi i Pavarur Hetimor i Kombeve të Bashkuara për Myanmarin. Dokumenti thekson se forcat e armatosura kanë shtuar sulmet ajrore ndaj civilëve, ndërsa hetuesit e OKB-së po grumbullojnë prova për krime të mundshme lufte dhe krime kundër njerëzimit.
Sagaing konsiderohet një prej qendrave kryesore të rezistencës së armatosur kundër juntës, e cila mori pushtetin me grusht shteti në shkurt të vitit 2021 dhe rrëzoi qeverinë e zgjedhur të drejtuar nga Aung San Suu Kyi.
Që prej grushtit të shtetit, Myanmar është përfshirë në një luftë civile që përplas ushtrinë me grupet e armatosura pro-demokracisë dhe milicitë e pakicave etnike.
Ndërsa kapacitetet e forcave qeveritare në terren janë dobësuar gradualisht, junta është mbështetur gjithnjë e më shumë te aviacioni ushtarak gjatë viteve të fundit, duke shkaktuar rritje të numrit të viktimave civile.
