Çmimi i benzinës në Greqi ka kaluar pragun e 2 eurove për litër, ndërsa sinjalet nga tregu flasin për rritje të mëtejshme gjatë ditëve në vijim. Mesatarja kombëtare për benzinën pa plumb është 2 euro e 1,5 cent për litër, kurse nafta shitet mesatarisht me 2 euro e 2 cent.
Të lidhura
None found
Përfaqësuesit e pikave të karburantit thonë se vala e shtrenjtimit nuk ka përfunduar. Vetëm gjatë javës së fundit, rafineritë kanë rritur çmimin e naftës me 11 deri në 12 cent dhe atë të benzinës me 6 deri në 7 cent. Një pjesë e kësaj rritjeje ende nuk është reflektuar te konsumatorët, por pritet të shfaqet në pompat e karburantit në ditët e ardhshme.
Shqetësimi kryesor lidhet me datën 1 shtator, pasi masat aktuale të mbështetjes nga qeveria përfundojnë më 31 gusht. Në rast se ato nuk zgjaten, Federata e Shitësve të Karburanteve paralajmëron se benzina mund të arrijë në 2 euro e 20 cent për litër, ndërsa nafta në 2 euro e 25 cent.
Kjo rritje vjen në një periudhë kur familjet greke po përballen ende me shpenzime të larta jetese. Inflacioni në vend arriti në 3,4% gjatë korrikut, ndërsa kostot e energjisë dhe shërbimeve vazhdojnë të rëndojnë buxhetet familjare. Efektet e çmimeve të karburanteve, megjithatë, nuk kufizohen vetëm te drejtuesit e automjeteve.
Shtrenjtimi i naftës rrit kostot e transportit dhe mund të ndikojë më tej në çmimet e ushqimeve dhe produkteve të tjera. Qeveria po vlerëson mundësinë e vazhdimit të subvencionit për naftën edhe pas përfundimit të gushtit. Ndërkohë, vëmendja është përqendruar te Panairi Ndërkombëtar i Selanikut, që zhvillohet në fillim të shtatorit, ku kryeministri Kyriakos Mitsotakis pritet të prezantojë një paketë të re lehtësimesh për familjet, pensionistët, shtresën e mesme dhe bizneset e vogla.
