Që prej fillimit të vitit, në Greqi janë arrestuar më shumë se 300 persona, të dyshuar për shkaktimin e zjarreve në pyje. Në këtë shifër përfshihen raste të lidhura si me zjarrvënien e qëllimshme, ashtu edhe me pakujdesinë.
Të lidhura
None found
Zëdhënësi i zjarrfikësve grekë, Giorgos Artopoios, bëri të ditur se 272 raste dyshohet se kanë ardhur si pasojë e pakujdesisë, ndërsa 36 të tjera mendohet se janë shkaktuar me dashje.
Një prej episodeve më të fundit ndodhi në ishullin e Kretës, ku një zjarr pranë një hapësire pyjore dyshohet se nisi pasi një turist ndezi një skarë me qymyr në afërsi të pyllit. Para autoriteteve, ai tha se nuk e dinte që ndezja e zjarreve në ambiente të hapura ndalohej gjatë periudhave me erëra të forta dhe mot të thatë.
Autoritetet greke kanë paralajmëruar se rreziku për zjarre pritet të shtohet për shkak të thatësirës, erërave të fuqishme dhe temperaturave ekstreme. Në pjesën më të madhe të vendit, temperaturat gjatë ditëve në vijim pritet të kalojnë 40 gradë Celsius, ndërsa vala e të nxehtit parashikohet të vazhdojë deri në mesin e javës së ardhshme. Këto kushte atmosferike krijojnë terren për përhapjen e shpejtë të flakëve dhe kanë rritur gatishmërinë e shërbimeve të emergjencës.
Paralelisht, Greqia po merr masa për të mbrojtur monumentet historike nga pasojat e zjarreve. Për të shmangur dëmet në zonat me rëndësi kulturore, autoritetet kanë nisur vendosjen e një sistemi modern monitorimi dhe alarmi, i cili synon të zbulojë herët vatrat e zjarrit. Pajisja është testuar me sukses pranë Akropolit të Mikenës, në gadishullin e Peloponezit, dhe planifikohet të instalohet në 22 qendra historike në të gjithë vendin.
Sistemi përbëhet nga kamera optike dhe termike, ku disa prej tyre sigurojnë mbulim panoramik 360 gradë. Pajisjet janë në gjendje të mbikëqyrin sipërfaqe të mëdha dhe të dallojnë shenjat e para të një zjarri. Deri në fund të gushtit pritet të vihen në funksion gjashtë sisteme të reja, ndërsa tetë të tjera parashikohet të instalohen gjatë shtatorit.
