Autoritetet gjermane i kanë kërkuar Rumanisë ekstradimin e një personi të dyshuar për zbulimin e një arsenali nëntokësor në një zonë pyjore pranë Berlinit. Mediat gjermane e kanë lidhur këtë depo me shërbimet ruse të inteligjencës.
Të lidhura
None found
Lajmi vjen dy javë pas gjetjes së një droni me eksplozivë në aeroportin e Leipzigut. Ministri i Brendshëm gjerman, Alexander Dobrindt, bëri të ditur se prokurorët federalë kanë nisur hetime për depon e fshehtë të armëve, nën dyshimin se ajo lidhet me përgatitjen e një akti të rëndë dhune që rrezikon sigurinë kombëtare.
“Ky rast tregon se po veprojmë nën një nivel të lartë kërcënimi”, deklaroi Dobrindt para gazetarëve. Duke iu referuar edhe incidentit në Leipzig, ministri tha se nuk mund të përjashtohej përfshirja e “fuqive të huaja”.
Sipas raportimeve të mëparshme të mediave lokale, rreth një vit më parë autoritetet gjermane gjetën dy pistoleta dhe municione në një zonë të pyllëzuar jashtë kryeqytetit. Zbulimi u bë pasi agjentët e shërbimit vendas të inteligjencës morën një informacion.
Çështja u mbajt në fokus të një operacioni të fshehtë të shërbimeve shtetërore të sigurisë dhe kundërspiunazhit. Sipas raportimeve të veçanta të revistës “Der Spiegel”, dyshimi ishte se inteligjenca ruse po përgatiste vrasje në territorin gjerman.
Dobrindt shpjegoi se armët nuk u larguan menjëherë nga vendi ku u gjetën. Autoritetet, pasi i bënë ato të papërdorshme, i lanë aty me shpresën se do të siguronin të dhëna përmes një operacioni disa mujor të mbikëqyrjes elektronike.
Personi i ndaluar në Rumani, kombësia e të cilit nuk është bërë publike, u cilësua nga ministri gjerman si një “agjent i nivelit të ulët”. Ai shtoi se gjatë këtij viti janë ndaluar edhe disa operativë të tjerë të së njëjtës kategori.
Rusia ka mohuar në mënyrë të përsëritur çdo përfshirje në akte sabotazhi, përpjekje për përçarje apo kërcënime ndaj vendeve anëtare të Bashkimit Evropian.
