Pas një dislokimi prej 272 ditësh, aeroplanmbajtësja amerikane USS Abraham Lincoln ka mbërritur të enjten në San Diego, duke përmbyllur misionin e saj në Lindjen e Mesme. Për mijëra marinarët që ndodhen në bord, megjithatë, kthimi në port nuk shënon fundin e udhëtimit.
Të lidhura
None found
Rreth 5,000 pjesëtarë të ekuipazhit duhet të përshkojnë edhe afro 13 mijë milje detare, një udhëtim që parashikohet të zgjasë katër deri në pesë javë.
USS Abraham Lincoln u nis nga San Diego më 21 nëntor 2025. Gjatë qëndrimit të saj të gjatë në det, anija pati vetëm dy ndalesa të shkurtra: të parën në Guam, në dhjetor, dhe të dytën në Oman, ku u furnizua me karburant.
Angazhimi kryesor i aeroplanmbajtëses lidhej me operacionet ushtarake amerikane kundër Iranit, në një kohë kur Shtetet e Bashkuara kishin shtuar ndjeshëm forcat e tyre në Lindjen e Mesme.
Ky dislokim është cilësuar si një nga më të vështirët për Marinën amerikane gjatë viteve të fundit. Ekuipazhi kaloi muaj të tërë pa mundësi të rëndësishme pushimi në tokë, ndërsa në periudhën e fundit u raportuan vështirësi të rënda në kushtet e jetesës në anije.
Ligjvënës demokratë kanë shprehur shqetësime për mungesën e furnizimeve bazë, problemet me cilësinë e ujit, dëmtimet në hapësirat sanitare dhe përkeqësimin e gjendjes mendore të disa marinarëve.
Dyshimet janë se situata e furnizimeve u rëndua pas shkatërrimit nga Irani të një baze detare amerikane në Manama të Bahreinit. Baza ishte një prej qendrave kryesore të mbështetjes për trupat amerikane në Gjirin Persik.
Admirali Brad Cooper, kreu i Komandës Qendrore të SHBA-së, është përpjekur të zbusë disa prej ankesave dhe i ka përshkruar një pjesë të problemeve si “lajme të vjetra”. Në një artikull të publikuar në The Wall Street Journal, ai i uroi ekuipazhit të Lincoln një kthim të sigurt pranë familjeve.
Megjithatë, largimi i USS Abraham Lincoln nuk do të thotë se Shtetet e Bashkuara po pakësojnë praninë e tyre ushtarake në rajon. Vendin e saj e ka zënë USS George Washington, aeroplanmbajtësja amerikane me bazë në Japoni, e cila tashmë është vendosur nën kontrollin operacional të CENTCOM.
Jashtë Gjirit Persik, SHBA-ja vazhdon të ketë rreth 20 anije luftarake në rajon. Kjo forcë përfshin dy grupe luftarake aeroplanmbajtësesh, të ndërtuara rreth USS George H.W. Bush dhe USS George Washington, si edhe një forcë amfibe me një Njësi Ekspedite Detare dhe disa shkatërrues.
Një tjetër detyrë e këtyre forcave është zbatimi i bllokadës së rinovuar ndaj porteve iraniane, e urdhëruar nga Presidenti Donald Trump. Bllokada ka hyrë tashmë në ditën e 38-të.
