Trupi i ish-profesorit të Universitetit të Cambridge, Jason Arday, u gjet të premten në banesën e tij në jug të Londrës. Kryeministri britanik Andy Burnham e përshkroi vdekjen e tij si një “tragjedi në shumë nivele”.
Të lidhura
None found
Arday ishte larguar nga detyra e profesorit në Universitetin e Cambridge një javë më parë, pas akuzave për plagjiaturë, të cilat ai i kishte hedhur poshtë. Vdekja e tij u konstatua pak pas orës 15:00 të së premtes.
Familja e tij, përmes një deklarate të publikuar nga botuesi Simon & Schuster UK, tha se ishte “e shokuar” nga humbja e “një babai, partneri, vëllai, xhaxhai dhe biri të mrekullueshëm”.
Burnham, gjatë një vizite në Cornwall të shtunën, u shpreh se rasti ishte veçanërisht tragjik për familjarët dhe miqtë e Arday.
“Ky nuk është një moment për të nxituar në gjykim. Është një moment për reflektim, për të reflektuar mbi mënyrën se si arritën gjërat deri këtu. Është një gjendje vërtet e trishtueshme dhe e mjerueshme dhe mendoj se të gjithë sot mendojmë për Jasonin, kontributin e tij, familjen dhe miqtë e tij”, tha ai.
Ndërkohë, fushata e nisur në GoFundMe nga aktivisti i Windrush, Sir Patrick Vernon, ka mbledhur më shumë se 20 mijë paund për familjen e Arday.
Mes personave që kanë shprehur ngushëllimet dhe kanë nderuar kujtimin e tij janë kryebashkiaku i Londrës, Sadiq Khan, si edhe deputetja laburiste Bell Ribeiro-Addy.
Khan deklaroi se ishte “i shkatërruar” për familjen dhe miqtë e Arday. Ai e cilësoi presionin publik ndaj ish-akademikut si “të papranueshëm” dhe foli kundër një fushate abuzive.
“Jason Arday ishte viktimë e një turpi publik të dëmshëm që njerëzit e tjerë në pozicionin e tij thjesht nuk do ta kishin përballuar. Vdekja e tij ishte një tragjedi, por edhe një herë duhet të jetë një thirrje zgjimi për të gjithë ne”, u shpreh Khan.
Edhe Bell Ribeiro-Addy, gjatë një interviste për Newsnight, kritikoi atë që ajo e quajti “gjueti shtrigash” nga mediat. Sipas deputetes, sulmet nuk kishin në shënjestër vetëm Ardayn, por edhe personat që e mbështesnin.
Ajo ngriti gjithashtu pretendimin se raca ishte një nga ndryshimet mes Arday dhe akademikëve të tjerë për të cilët foli, duke deklaruar: “Dallimi midis tyre dhe tij ishte se ata ishin të bardhë, dhe ai jo.”
Reagim pati edhe nga deputeti konservator James Cleverly. Në një postim në X, ai tha se disa njerëz në institucionet akademike “kanë pyetje serioze për t’u përgjigjur”.
Simon Baron-Cohen, psikolog klinik, drejtor i Qendrës së Kërkimeve për Autizmin dhe mik i Arday, tha se kishte komunikuar me të të premten në mëngjes. Sipas tij, Arday i kishte thënë se nuk ishte më në gjendje të vazhdonte.
Baron-Cohen bëri të ditur se Arday ishte diagnostikuar që në fëmijëri me vështirësi që përfshinin autizmin, vonesën gjuhësore dhe dallime në të nxënë.
“Ai ishte një fëmijë i cenueshëm, një adoleshent i cenueshëm dhe një i rritur i cenueshëm, kështu që ai kishte nevojë dhe meritonte mbrojtje, mbështetje dhe përshtatje të arsyeshme në çdo hap të rrugës”, tha ai.
Akuzat fillestare ndaj Arday lidheshi me plagjiaturën e punës së një personi tjetër në tezën e doktoraturës, pretendime që ai i mohoi. Një hetim i Universitetit Liverpool John Moores, ku ai kishte përfunduar doktoraturën, e mbështeti vendimin për t’i dhënë atij këtë gradë në fillim të këtij viti.
Gjatë javëve të fundit u vunë në dyshim edhe aspekte të tjera të historisë së tij personale, mes tyre pretendimet për mbledhje të jashtëzakonshme fondesh për bamirësi dhe rezultatet e tij në vrapimin në distanca të gjata. Po ashtu, ai u përball me pyetje lidhur me pretendimin se nuk kishte qenë verbal si fëmijë.
Daniel Kebede, sekretari i përgjithshëm i Sindikatës Kombëtare të Arsimit, tha se Arday ishte përballur me “një përleshje publike dhe brutale që shkaktoi një tiradë racizmi”.
“Ekziston një ndryshim i thellë midis shqyrtimit të hollësishëm dhe një fushate të qëndrueshme publike që e shndërron një individ në një simbol të gjithçkaje që e djathta beson se është e gabuar me DEI-n”, deklaroi Kebede.
Policia Metropolitane njoftoi se rasti po hetohet si një vdekje e papritur.
