Kina prezantoi të martën standardet e para kombëtare me zbatim të detyrueshëm për sigurinë e automjeteve të përparuara autonome. Sipas mediave shtetërore, këto rregulla do të nisin të zbatohen vitin e ardhshëm.
Të lidhura
None found
Gazeta shtetërore China Daily, duke iu referuar Ministrisë së Industrisë dhe Teknologjisë së Informacionit, raportoi se kërkesat e reja të sigurisë për sistemet e automatizuara të drejtimit në automjetet inteligjente do të hyjnë në fuqi korrikun e ardhshëm.
Përpara se teknologjitë vetëdrejtuese të Nivelit 3 dhe Nivelit 4 të përdoren në rrugë, kompanitë automobilistike duhet të garantojnë që siguria të përfshihet në të gjitha fazat e ngritjes së sistemeve.
Rregullat parashikojnë gjithashtu krijimin e një mekanizmi për administrimin e sigurisë gjatë gjithë ciklit jetësor të automjetit, nga projektimi, zhvillimi dhe prodhimi deri te funksionimi pas vendosjes së tij.
Para aktivizimit të funksioneve autonome të drejtimit, kompanitë do të detyrohen të përdorin sisteme për menaxhimin e rrezikut dhe të realizojnë simulime, testime në pista të mbyllura, si dhe prova në kushte reale rrugore.
Vendimi i Pekinit merret në një kohë kur prodhuesit ndërkombëtarë të automjeteve dhe kompanitë teknologjike po konkurrojnë për ta kaluar drejtimin autonom nga zonat e testimit në transportin e përditshëm.
Në vitin 2025, Kina miratoi aksesin me kusht për dy modele automjetesh autonome të Nivelit 3, duke hedhur një hap fillestar drejt përdorimit më të gjerë komercial.
Në këto mjete, prodhuesit duhet të instalojnë sisteme që kontrollojnë nëse drejtuesit janë të vëmendshëm, të gatshëm dhe të aftë ta rimarrin kontrollin kur kjo kërkohet.
Përmes manualeve të përdorimit, faqeve të internetit dhe ekraneve të vendosura brenda automjetit, kompanitë duhet t’u shpjegojnë qartë përdoruesve shkallën e automatizimit, kufijtë e funksionimit, kufizimet dhe përgjegjësitë./ AA.
