Vladimir Putin realizoi vizitën e parë zyrtare në arkipelagun e Ishujve Kuril, territor që prej dekadash është objekt mosmarrëveshjeje ndërmjet Rusisë dhe Japonisë.
Agjencitë shtetërore ruse të lajmeve njoftuan se presidenti rus i “vizitoi personalisht Ishujt Kuril për herë të parë”. Sipas raportimit të TASS-it, gjatë qëndrimit atje ai inspektoi Varyag-un, një kryqëzor të klasit Slava dhe anijen kryesore të Flotës Ruse të Paqësorit.
Të lidhura
None found
Pasi qëndroi në Juzhno-Sakhalinsk, në ishullin Sakhalin, Putin udhëtoi drejt Iturupit, një tjetër ishull i arkipelagut, ku pa nga afër një fabrikë të përpunimit të peshkut.
Japonia, e cila pretendon sovranitetin mbi të paktën katër prej ishujve dhe nuk e njeh kontrollin rus mbi ta, reagoi menjëherë ndaj vizitës.
Ministri i Jashtëm japonez, Toshimitsu Motegi, bëri të ditur se qeveria e Japonisë “proteston fuqishëm” kundër udhëtimit të Vladimir Putinit në Ishujt Kuril.
“Territoret Veriore (…) janë një pjesë integrale e territorit të Japonisë, si historikisht ashtu edhe nga pikëpamja e së drejtës ndërkombëtare, dhe qeveria japoneze proteston fuqishëm kundër kësaj vizite”, deklaroi Motegi përmes një njoftimi të publikuar nga zyra e tij.
Duke iu referuar arkipelagut, ministri përdori emërtimin japonez “Territoret Veriore”. Ishujt ndodhen në hapësirën midis Hokkaidos dhe Gadishullit Kamchatka.
Debati territorial ruso-japonez për Ishujt Kuril vazhdon prej dekadash dhe mbetet një nga pengesat kryesore në marrëdhëniet mes dy shteteve.
