Enzo Maresca ka bërë të ditur një rregull të veçantë, i cili mund të ndikojë te mundësia që Erling Haaland të emërohet kapiteni i ardhshëm i Manchester Cityt.
Të lidhura
None found
Pas largimit të Pep Guardiolës, Maresca ka marrë drejtimin e skuadrës së “Etihad”, duke pasuar një trajner katalanas që qëndroi për një dekadë në krye të klubit dhe arriti rezultate të mëdha.
Ish-tekniku i Chelseat, i cili në të kaluarën ka mbajtur dy pozicione të ndryshme te Manchester City, tashmë ka nisur të aplikojë filozofinë e tij gjatë përgatitjeve parasezonale të zhvilluara në Azi.
Një prej çështjeve kryesore që duhet të zgjidhë italiani është caktimi i kapitenit të ri, pas transferimit të Bernardo Silvës te Real Madrid.
Nën drejtimin e Guardiolës, kapiteni zakonisht përcaktohej përmes një grupi liderësh të votuar nga futbollistët, ndërsa ky grup vendoste më pas edhe për mbajtësin e shiritit.
Megjithatë, në sezonin e fundit Guardiola vendosi vetë që Bernardo Silva të ishte kapiten, pasi përpjekja për t’ia besuar këtë rol Kyle Ëalker nuk dha rezultatet e pritshme.
Ruben Dias, Erling Haaland dhe Rodri, për të cilin raportohet se mund të transferohet te Barcelona, janë aktualisht pjesë e grupit drejtues të Manchester Cityt.
Megjithatë, një rregull i vendosur nga Maresca mund të krijojë një situatë të ndërlikuar nëse shiriti i kapitenit i besohet Haalandit.
Gjatë një bisede me gazetarët që ndjekin Manchester Cityn në Seul, trajneri italian tregoi se te Leicester City dhe Chelsea kishte zbatuar një praktikë të veçantë: kapiteni duhej të shkonte pranë bankinës sa herë që skuadra shënonte, për të marrë udhëzime nga trajneri.
“Te Leicester dhe Chelsea kisha vendosur që, pas çdo goli tonë, kapiteni të vinte te bankina për të marrë udhëzime”, tha Maresca, sipas Sam Lee të The Athletic.
“Por kur kapiteni është ai që shënon, atëherë duhet ta lejosh të festojë. Nëse kapiten do të jetë Erlingu, dreqin, kemi një problem. A mund ta imagjinoni?”, shtoi ai.
Maresca përmendi edhe një rast konkret: “Nëse e ndoqët ndeshjen këtu të mërkurën, Rubeni erdhi te bankina. Mendoj se, edhe kur kanë kaluar vetëm dy ose tre minuta, gjithmonë ekziston diçka që duhet rregulluar”, përfundoi ai.
