Muaji i fundit ka qenë i mbushur me ngjarje të pazakonta për Omar Artanin, gjyqtarin somalez që fillimisht u përball me një pengesë serioze pak para nisjes së Kupës së Botës 2026.
Të lidhura
None found
Pasi mbërriti në Miami për të qenë pjesë e turneut madhor, Artanit nuk iu lejua hyrja në Shtetet e Bashkuara të Amerikës. Vendimi lidhej me ndalimin e hyrjes në territorin amerikan për shtetasit e Somalisë, vendit nga vjen gjyqtari.
Vetëm disa javë pas kësaj përvoje, ai mori një mundësi të veçantë nga UEFA për t’u rikthyer në qendër të vëmendjes. Artan është caktuar gjyqtar kryesor i Superkupës UEFA, ndeshje në të cilën do të përballen Paris Saint-Germain dhe Aston Villas.
Në një intervistë për faqen zyrtare të UEFA-s, 34-vjeçari foli për vështirësitë dhe emocionet që përjetoi pasi u kthye nga SHBA-ja.
“Kalova një periudhë jashtëzakonisht të vështirë. Shumë njerëz mund ta kuptojnë këtë ndjesi, sepse është shumë e rëndë të punosh për vite me radhë për një objektiv dhe, në fund, të mos kesh mundësi ta realizosh. Pavarësisht kësaj, u jam jashtëzakonisht mirënjohës njerëzve nga e gjithë bota për mbështetjen e madhe që më dhanë”.
Drejtimi i Superkupës UEFA do të përbëjë një tjetër pikë historike në karrierën e Artanit. Ai do të jetë gjyqtari i parë joevropian që arbitron një ndeshje të këtij lloji, duke hapur një kapitull të ri edhe për futbollin afrikan.
Artan ka hyrë më parë në histori si gjyqtari i parë somalez që ka drejtuar një finale të Ligës së Kampionëve të Afrikës. Në vitin 2025, ai u zgjodh gjyqtari më i mirë afrikan, ndërsa më vonë mori edhe përzgjedhjen për Kupën e Botës 2026.
“Kjo do të jetë hera e parë që do të drejtoj një ndeshje në Evropë. Është e mrekullueshme të përjetosh aventura të reja, të krijosh kujtime dhe të fitosh njohuri të tjera. Për mua është diçka e jashtëzakonshme që CAF-i bashkëpunon me UEFA-n, e cila është ndër konfederatat më të përparuara në botë në fushën e arbitrimit”, deklaroi Artan.
Gjyqtari somalez vuri në dukje edhe vlerën që ka bashkëpunimi ndërmjet dy konfederatave.
“Futbolli në Evropë zhvillohet në një nivel shumë të lartë dhe standardi është i shkëlqyer. Mendoj se gjyqtarët e CAF-it kanë shumë për të mësuar nga UEFA, por e njëjta gjë vlen edhe në drejtimin tjetër. Të dyja palët përfitojnë. Është nder për mua që jam zgjedhur të drejtoj një takim kaq të rëndësishëm. Falënderoj UEFA-n, presidentin e CAF-it dhe të gjithë anëtarët e saj”.
UEFA vendosi në qershor që Artani të ishte gjyqtari kryesor i Superkupës. Emërimi erdhi vetëm disa ditë pasi ai ishte detyruar të largohej nga SHBA-ja dhe të kthehej në Somali.
Telefonata e UEFA-s solli gëzim të madh si për të, ashtu edhe për familjen e tij.
“Në çastin kur morëm telefonatën, unë dhe familja ime u ndjemë shumë të lumtur. Në Evropë, dhe sidomos në Austri, jeton një komunitet i madh somalezësh. Ata janë tepër entuziastë që unë do të arbitroj një ndeshje të këtij niveli”.
Për Artanin, kjo mundësi është shpërblim i përkushtimit dhe punës së vazhdueshme, pavarësisht pengesave me të cilat është përballur gjatë jetës.
“Kam pasur fat, por njëkohësisht kam punuar jashtëzakonisht shumë për të mbërritur deri në këtë pikë dhe ndihem shumë krenar. Jam rritur në rrethana shumë të vështira, siç mund ta imagjinoni, por ato nuk më ndaluan asnjëherë që të vazhdoja pas ëndrrave të mia”, përfundoi Artan.
