Nga ndalimi në Dubai te kthimi në Dublin, Daniel Kinahan ekstradohet në Irlandë për t’u përballur me akuzat për krim të organizuar

Daniel Kinahan, i konsideruar nga autoritetet si një nga figurat drejtuese të një rrjeti të fuqishëm kriminal me shtrirje ndërkombëtare, është ekstraduar nga Emiratet e Bashkuara Arabe në Irlandë, ku pritet të përballet me drejtësinë.

Avioni qeveritar irlandez, në të cilin ndodhej 49-vjeçari, u ul në Casement Aerodrome në Baldonnell, në jugperëndim të Dublinit. Transferimi u krye nën masa të gjera sigurie.

Kinahan u arrestua në Emiratet e Bashkuara Arabe në prill, ndërsa kthimi i tij në Irlandë u shoqërua me përgatitje të posaçme. Shërbimi irlandez i burgjeve kishte siguruar më herët një automjet të blinduar dhe të mbrojtur ndaj shpërthimeve për transportin e tij, ndërsa raportohet se janë forcuar edhe masat e sigurisë në burgun e sigurisë së lartë Portlaoise.

Agjencia Kombëtare e Krimit e Mbretërisë së Bashkuar deklaron se karteli Kinahan ka vepruar për më shumë se 20 vjet në trafikimin e sasive të mëdha të drogës dhe armëve në vende të ndryshme të botës.

Akuzat zyrtare ndaj Kinahan pritet të ngrihen në orët e ardhshme. Më pas, ai do të dalë përpara Gjykatës Speciale Penale të Irlandës, e cila përbëhet nga tre gjyqtarë dhe shqyrton çështje të rënda kriminale, përfshirë rastet e krimit të organizuar.

Për shkak të rëndësisë së çështjes dhe rrezikut të mundshëm për sigurinë, autoritetet irlandeze kanë zbatuar masa të jashtëzakonshme gjatë transferimit të tij.

Kryeministri i Irlandës, Micheál Martin, ka përshëndetur bashkëpunimin ndërmjet institucioneve irlandeze dhe autoriteteve të Emirateve të Bashkuara Arabe në përpjekjet kundër krimit të organizuar ndërkombëtar.

Martin nuk ka pranuar të komentojë drejtpërdrejt çështjen, duke thënë se nuk dëshiron të ndikojë në zhvillimin e procesit gjyqësor. Megjithatë, ai ka deklaruar se policia irlandeze meriton vlerësim për punën e vazhdueshme në luftën kundër krimit të organizuar.

Avokati i Kinahan ka hedhur poshtë më herët pretendimet se klienti i tij është drejtues i një organizate kriminale. Nëse ai mban përgjegjësi për akuzat që mund t’i ngrihen, do të vendoset përmes procesit gjyqësor.