Një valë e re intensive të nxehti pritet të godasë Mbretërinë e Bashkuar, ku temperaturat mund të arrijnë deri në 36 gradë Celsius gjatë ditëve të ardhshme.
Të lidhura
None found
Sipas të dhënave meteorologjike, rritja e temperaturave do të nisë gradualisht gjatë fundjavës. Vlerat më të larta priten të mërkurën dhe të enjten, kryesisht në Anglinë Lindore dhe Juglindore.
Në pjesën më të madhe të Anglisë, paralajmërimet shëndetësore për të nxehtin do të jenë aktive nga mëngjesi i së shtunës deri në mbrëmjen e së martës. Institucionet kanë ngritur shqetësimin për pasojat që temperaturat e larta mund të kenë mbi shërbimet shëndetësore dhe ato të kujdesit social.
Kjo pritet të jetë vala e pestë e të nxehtit që ka përfshirë Britaninë gjatë këtij viti. Pas periudhave të gjata me temperatura të larta, dy episode të tilla të regjistruara në maj dhe qershor janë lidhur me mbi 2,700 vdekje të tepërta.
Gjatë këtij viti, temperaturat kanë kaluar 30°C për 33 ditë në të paktën një zonë të Mbretërisë së Bashkuar. Rekordi i vitit 1995, kur kjo shifër arriti në 34 ditë, pritet të tejkalohet javën e ardhshme.
Paralelisht me të nxehtin, vendi po përballet edhe me përkeqësimin e thatësirës. Në Angli dhe Uells, korriku rezultoi muaji më i thatë i regjistruar që nga fillimi i matjeve në vitin 1836.
Agjencia e Mjedisit ka bërë të ditur se disa zona mund të përfshihen në kushte thatësire gjatë javës së ardhshme. Rezervuarët në Angli kanë aktualisht 69% të nivelit të ujit, rreth 12% më pak se mesatarja afatgjatë për këtë periudhë të vitit.
Mungesa e reshjeve, e kombinuar me temperaturat e larta, ka shtuar edhe rrezikun e zjarreve në pyje. Indeksi i Ashpërsisë së Zjarrit parashikon që të dielën rreziku të arrijë kategorinë më të lartë, “jashtëzakonisht i rëndë”, në pjesën më të madhe të Anglisë Lindore dhe Juglindore.
Situata po ndiqet nga autoritetet britanike, ndërsa sinoptikanët thonë se i nxehti dhe kushtet e thata mund të vazhdojnë edhe në ditët në vijim.
