Arsenali ka rihapur interesimin për sulmuesin anësor të Juventusit, Kenan Yildiz, i cili raportohet se po përgatitet t’u kërkojë drejtuesve të klubit italian largimin. Reprezentuesi turk është shndërruar në objektivin kryesor të trajnerit Mikel Arteta pasi dështoi mundësia për transferimin e Vinicius Junior, që rinovoi kontratën me Real Madridin.
Te Arsenali besohet se Yildiz dëshiron ta vijojë karrierën në Londër. Pas paraqitjeve të spikatura në Serie A, 21-vjeçari është konsoliduar si një prej talenteve më premtues të futbollit dhe tani pritet t’ua bëjë të ditur drejtuesve të Juventusit vullnetin për t’u larguar.
Të lidhura
None found
Sipas raportimeve nga mediat angleze, lojtari synon të shprehë qartë dëshirën për t’iu bashkuar klubit nga veriu i Londrës. Megjithatë, një marrëveshje do të jetë e vështirë, pasi Juventusi i ka vendosur kartonit të tij një vlerë prej 140 milionë eurosh, shumë që do të rëndonte ndjeshëm buxhetin e Arsenalit.
Kenan Yildiz ka qenë më herët në listën e dëshirave të Arsenalit. Gazetari Sacha Tavolieri e ka cilësuar turkun si “prioritetin absolut” të Artetës. Ndërkohë, The Athletic raportoi se klubi londinez kishte kërkuar zyrtarisht informacion për situatën e tij, por Juventusi ishte përgjigjur se futbollisti nuk ishte i disponueshëm për shitje.
Situata mund të marrë një tjetër drejtim, nëse konfirmohet se Yildiz po ushtron presion për t’u larguar. Interesi i Arsenalit është shtuar veçanërisht pasi objektivi fillestar i klubit, Vinicius Junior, nënshkroi këtë javë një kontratë të re afatgjatë me Real Madridin.
Paraqitjet e Yildiz sugjerojnë se ai mund t’i japë më shumë forcë repartit ofensiv të Arsenalit, i cili pati probleme me efikasitetin në disa ndeshje të sezonit të kaluar. Sipas analizës së platformës WhoScored, pikat e tij më të forta janë driblimi, finalizimi dhe pasimet kyçe.
Gjatë sezonit 2025/26, turku ka regjistruar një formë të shkëlqyer, me 11 gola dhe nëntë asistime në të gjitha kompeticionet. Këto statistika kanë bërë që shumë vëzhgues ta konsiderojnë atë një alternativë më të mirë se Gabriel Martinelli, i cili ka shfaqur luhatje në paraqitjet e tij gjatë vitit të fundit.
