Një grua nga Kina pretendon se një operacion estetik, i kërkuar për të bërë një ndryshim të vogël në nofull, i shkaktoi deformim të theksuar të fytyrës.
Të lidhura
None found
Pacientja, e njohur me pseudonimin Xiaoyu dhe me origjinë nga Wuhan, deklaroi se ndërhyrja duhej ta zhvendoste nofullën e poshtme vetëm 2 milimetra prapa. Sipas saj, në vend të kësaj, nofulla u shty rreth 13 milimetra përpara.
Ky ndryshim, sipas gruas, bëri që nofulla të dukej më e theksuar dhe ndikoi në mënyrë të dukshme në strukturën e fytyrës. Pas operacionit, ajo tha se vuri re zgjatje të fytyrës, asimetri dhe përkeqësim të problemeve me kafshimin.
Xiaoyu, e cila më parë punonte si modele, pretendon se ndryshimet në pamjen e saj i kushtuan vendin e punës. Ajo llogarit se ndërhyrjet për korrigjimin e gjendjes mund të kushtojnë më shumë se 300 mijë juanë (38540 euro) dhe se trajtimi mund të zgjasë për një periudhë të gjatë.
Gruaja u është drejtuar spitalit dhe autoriteteve shëndetësore lokale për ndihmë, por deri tani çështja nuk ka marrë ende një zgjidhje./TAR
