Gjatë verës, temperaturat e larta i shtyjnë shumë njerëz të kalojnë më tepër kohë në male, pyje dhe zona rurale. Në këto mjedise, larg qyteteve, rritet edhe mundësia e takimit me kafshë të egra, mes tyre edhe gjarpërinj.
Të lidhura
None found
Edhe pse jo të gjitha llojet e gjarpërinjve janë helmues, pickimi nga një specie helmuese mund të shkaktojë pasoja të rënda për shëndetin. Për këtë arsye, është e rëndësishme të njihni veprimet e duhura dhe të mos përdorni metoda që mund ta rëndojnë gjendjen, shkruan vizionplus.tv, transmeton klankosova.tv.
Shenjat që mund të tregojnë pickimin nga një gjarpër helmues
Ndër shenjat fillestare përfshihen dhimbja e fortë në zonën ku ka ndodhur pickimi, ënjtja e pjesës së prekur dhe shtimi gradual i simptomave me kalimin e kohës.
Hapat që duhen ndërmarrë menjëherë
Ruani qetësinë dhe ndihmojeni personin e pickuar të mos panikojë, pasi ankthi mund ta përkeqësojë situatën. Largohuni nga gjarpri dhe mos u përpiqni ta kapni apo ta eliminoni. Nëse nuk paraqet rrezik, një fotografi e bërë nga distanca mund t’u shërbejë mjekëve për identifikimin e tij.
Kontaktoni pa vonesë shërbimet e urgjencës ose transportojeni të lënduarin në spitalin më të afërt. Në rast se pickimi ka ndodhur në një gjymtyrë, hiqni unazat, byzylykët, orën dhe këpucët, sepse ënjtja mund të përparojë shpejt.
Personi duhet të qëndrojë i qetë dhe të kufizojë sa më shumë lëvizjet. Gjymtyra e prekur duhet të mbahet më poshtë se niveli i zemrës, me qëllim ngadalësimin e përhapjes së helmit.
Veprimet që duhen shmangur
Mos e prisni dhe mos e çani plagën; mos tentoni ta nxirrni helmin duke e thithur me gojë; mos përdorni turniket ose fashë tepër të shtrënguar; mos vendosni akull mbi vendin e pickimit; mos pini alkool; mos merrni qetësues pa këshillën e mjekut, përveç paracetamolit nëse rekomandohet; gjithashtu, mos përdorni pajisje për nxjerrjen e helmit, pasi ato mund të shkaktojnë më shumë dëme sesa përfitime.
Masat mbrojtëse gjatë qëndrimit në natyrë
Për shëtitjet në zona të tilla, zgjidhni këpucë të mbyllura dhe të forta, duke shmangur shapkate. Vishni rroba që mbulojnë këmbët dhe krahët, ndërsa me vete mbani një telefon të karikuar dhe, nëse mundeni, edhe një bateri rezervë.
Shmangni udhëtimin vetëm në vende të izoluara dhe shoqërohuni nga një person tjetër. Gjithashtu, përpara nisjes, kontrolloni se ku ndodhet qendra shëndetësore ose spitali më i afërt.
Njohja e këtyre masave mund të jetë vendimtare në rast pickimi nga gjarpri. Reagimi i shpejtë, së bashku me shmangien e praktikave të gabuara të ndihmës së parë, ndihmon në uljen e rrezikut të komplikacioneve dhe rrit mundësinë e një trajtimi të suksesshëm.
