Rodri ka arritur marrëveshje të plotë financiare me Barcelonën, pasi mesfushori i Manchester Cityt u lodh duke pritur një hap vendimtar nga Real Madridi për transferimin e tij.
Të lidhura
None found
Gazetari i MARCA-s, Matteo Moretto, raporton se reprezentuesi spanjoll pranoi ofertën e klubit katalunas për shkak të zhgënjimit nga mungesa e përparimit konkret të Real Madridit, ndonëse mes palëve ishin zhvilluar diskutime paraprake për disa javë.
Në zgjedhjen e Rodrit thuhet se kanë ndikuar edhe disa prej bashkëlojtarëve të tij në Kombëtaren e Spanjës, të cilët luajnë aktualisht për Barcelonën. Ata e kanë nxitur 30-vjeçarin të kalojë te skuadra e Hansi Flickut dhe të marrë rolin e liderit në mesfushë.
Barcelona gjithashtu i ka ofruar Rodrit garanci lidhur me mënyrën se si do të zhvillohen bisedimet me Manchester Cityn, duke e bindur atë se projekti i klubit është serioz.
Pasi kushtet personale janë dakorduar, drejtuesit katalunas pritet që gjatë orëve në vijim të vendosin kontakt zyrtar me Manchester Cityn për të diskutuar çmimin e transferimit.
Klubi anglez pritet të kërkojë një shumë prej 60 deri në 70 milionë euro për kartonin e 30-vjeçarit.
