Mesditës së kësaj të mërkure, dhjetëra automjete janë shkrumbuar nga një zjarr që shpërtheu në fshatin Penkovë, në territorin e Bashkisë së Selenicës.
Flakët përfshinë një pikë ku mblidheshin automjete për pjesë këmbimi, duke shkaktuar dëme të konsiderueshme materiale.
Të lidhura
None found
Pas njoftimit për ngjarjen, në zonë u angazhuan shërbimet zjarrfikëse nga Selenica, Vlora dhe Himara.
Ndërhyrja e tyre bëri të mundur izolimin e flakëve dhe parandaloi përhapjen e zjarrit në hapësirat përreth, ndërsa operacioni vijoi deri në shuarjen e plotë të vatrave aktive.
Pronari i biznesit, Tomian Hysaj, deklaroi se vlera e dëmit ekonomik shkon në rreth 35 milionë lekë të vjetra. Ai u ka bërë apel Bashkisë së Selenicës dhe institucioneve shtetërore që ta ndihmojnë për përballimin e humbjeve.
Shefi i Emergjencave Civile pranë Bashkisë së Selenicës, Arqile Kokalli, tha se bashkëpunimi mes ekipeve zjarrfikëse mundësoi mbajtjen nën kontroll të situatës dhe shmangien e përhapjes së mëtejshme të zjarrit.
Nga incidenti nuk raportohet për persona të lënduar. Shkaqet e zjarrit nuk janë përcaktuar ende dhe pritet që ato të sqarohen nga hetimi i autoriteteve përgjegjëse.
