Asociacioni i Gazetarëve të Shqipërisë (AGSH) ka kundërshtuar rregulloren e re të Gjykatës së Posaçme kundër Korrupsionit dhe Krimit të Organizuar (GJKKO), e cila pritet të zbatohet nga 1 shtatori. Sipas organizatës, rregullat e parashikuara vendosin kufizime të papranueshme dhe të pajustifikuara ndaj ushtrimit të profesionit të gazetarit.
Shqetësimi kryesor i AGSH-së lidhet me ndalimin e përdorimit të telefonave celularë nga përfaqësuesit e medias gjatë seancave gjyqësore. Asociacioni nënvizon se telefoni nuk shërben thjesht si pajisje elektronike, por përbën një instrument bazë pune për komunikimin me redaksinë, raportimin në kohë reale dhe përcjelljen e informacionit te publiku.
Të lidhura
None found
Në qëndrimin e saj, organizata argumenton se një masë e tillë nuk ndihmon në administrimin e drejtësisë, por kufizon pa arsye të drejtën kushtetuese të publikut për t’u informuar. Sipas AGSH-së, kjo bëhet edhe më problematike në kushtet kur në vend, dhe veçanërisht pranë Gjykatës së Posaçme, po zhvillohen procese historike me interes të lartë publik.
Lidhur me praninë e kamerave dhe regjistrimin brenda sallave të gjyqit, AGSH vlerëson se diskutimi duhet të mbështetet te zbatimi i saktë i ligjit dhe i Udhëzuesit të Këshillit të Lartë Gjyqësor, në vend që të orientohet drejt ndalimeve të përgjithshme.
Raporti krahasues i publikuar nga Asociacioni arrin në përfundimin se Shqipërisë nuk i duhen kufizime të tjera. Sipas tij, nevojitet zbatim i njëtrajtshëm i rregullave që janë aktualisht në fuqi, arsyetim i posaçëm për vendimin mbi çdo kërkesë dhe lejimi i regjistrimeve të pjesshme si alternativë ndaj ndalimeve të plota.
Rekomandimi kryesor i AGSH-së është garantimi i regjistrimit të pjesës hyrëse të seancave, në përputhje me Udhëzuesin e KLGJ-së. Organizata kërkon gjithashtu që secila kërkesë të shqyrtohet individualisht dhe që çdo kufizim ndaj medias të jetë proporcional, i argumentuar dhe i mbështetur në ligj.
Për këtë arsye, Asociacioni u ka bërë thirrje drejtuesve të GJKKO-së që ta shtyjnë hyrjen në fuqi të rregullores dhe të nisin një proces konsultimi me AGSH-në, komunitetin e gazetarëve, organizatat mediatike dhe palët e tjera të interesuara.
Sipas AGSH-së, një akt që ndikon në një masë të tillë mbi lirinë e medias dhe të drejtën e qytetarëve për informacion nuk duhet të miratohet pa dialog dhe pa përmbushur standardet e transparencës.
Asociacioni ka shprehur gatishmërinë për të dhënë ekspertizën e tij dhe për të vënë në dispozicion rekomandimet e raportit të publikuar së fundmi. Synimi, sipas organizatës, është krijimi i një modeli që siguron si zhvillimin normal të procesit gjyqësor, ashtu edhe mundësinë e medias për ta informuar publikun lirisht, profesionalisht dhe me përgjegjësi.
