Greqia renditet mes disa shteteve evropiane të goditura nga zjarre shkatërruese, përhapja e të cilave është favorizuar nga valët e të nxehtit dhe mungesa e reshjeve.
Të lidhura
None found
Kryeministri grek, Kyriakos Mitsotakis, tha se vendi ndodhet përballë “kushteve ekstreme të motit”. Ai paralajmëroi se, për shkak të vatrave të shumta që vazhdojnë të përfshijnë territorin, ditët e ardhshme do të jenë “jashtëzakonisht të vështira”.
Mitsotakis bëri të ditur se erërat kanë arritur shpejtësi deri në 100 kilometra në orë, duke e bërë të pamundur përdorimin e sigurt të mjeteve ajrore.
“Ka momente kur natyra dhe intensiteti i fenomeneve të motit tejkalojnë çdo planifikim njerëzor dhe çdo aftësi operacionale”, shkroi ai në Facebook.
Prej mesit të korrikut, flakët kanë goditur gjithashtu Francën, Spanjën dhe Portugalinë, ndërsa qindra mijëra banorë janë detyruar të largohen nga shtëpitë e tyre.
Autoritetet në Madrid i kanë përshkruar zjarret e këtij viti si më të rëndat e regjistruara ndonjëherë në rajon.
Të dhënat e Bashkimit Evropian tregojnë se gjatë vitit 2026 në të gjithë Spanjën janë djegur mbi 200 mijë hektarë tokë, një sipërfaqe rreth pesë herë më e madhe se mesatarja e së njëjtës periudhë të vitit.
Në Francë, presidenti Emmanuel Macron e cilësoi javën e kaluar si “krejtësisht të paprecedentë” zjarrin e madh që përfshiu rajonin Gironde.
Me vatra të shumta zjarri është përballur edhe Mbretëria e Bashkuar.
