Qytetarët turq mund të udhëtojnë më lehtë drejt 12 ishujve grekë të Egjeut përmes një skeme të posaçme, e cila nuk kërkon pajisjen paraprake me vizë të plotë Shengen.
Të lidhura
None found
E njohur në Turqi si “viza në derë”, kjo praktikë nisi në prill të vitit 2024, kur u aplikua fillimisht në 10 ishuj, përpara se lista të zgjerohej. Mes destinacioneve të përfshira janë Samosi, Rodosi, Kiosi dhe Kosi, të vendosura pranë bregdetit turk.
Dokumenti lëshohet në momentin e mbërritjes dhe u jep turistëve turq të drejtën të qëndrojnë deri në shtatë ditë në ishullin ku kanë hyrë. Viza nuk zgjatet dhe nuk mund të përdoret për të udhëtuar në Greqinë kontinentale ose në shtete të tjera të zonës Shengen.
Kjo mundësi është shndërruar në një zgjedhje të rëndësishme për turistët nga Turqia, veçanërisht në një kohë kur procedurat për marrjen e vizave Shengen janë bërë më të kushtueshme dhe më të vështira.
Të dhënat e Bankës së Greqisë tregojnë se gjatë vitit 2025 vendi u vizitua nga rreth 1,5 milionë shtetas turq, ndërsa një vit më parë numri ishte 1,2 milionë. Rritja e vizitorëve ka dhënë një kontribut të ndjeshëm në ekonominë e ishujve. Në Samos, tragetet mbërrijnë çdo ditë me turistë nga brigjet turke, ndërsa një numër i madh restorantesh ofrojnë menu në gjuhën turke.
Kryeministri grek Kyriakos Mitsotakis e ka vlerësuar skemën si një sukses të veçantë dhe ka bërë të ditur se Athina e Ankaraja po kërkojnë zgjatjen e saj. Krahas ndikimit ekonomik, programi konsiderohet edhe një mjet që mund të afrojë dy popujt, pavarësisht përplasjeve të vazhdueshme politike mes dy vendeve.
