Forcat amerikane, në bashkëpunim të ngushtë me Arabinë Saudite, kanë ndërmarrë një operacion ushtarak kundër disa objektivave të milicive të lidhura me Iranin në territorin irakian.
Të lidhura
None found
Përmes një deklarate, Komanda Qendrore e Shteteve të Bashkuara konfirmoi se goditjet u përqendruan në qendrat e furnizimit dhe depot e armatimit. Sipas Uashingtonit dhe Riadit, këto grupe kanë orkestruar mbi 30 sulme me avionë pa pilot në harkun kohor të 72 orëve të fundit, duke vepruar nën direktivat e Gardës Revolucionare të Iranit.
Synimet besohet se ishin pjesë e rrjetit të milicive Hashd al-Shaabi. Zëra nga brenda kësaj aleance raportuan se së paku dhjetë anëtarë të saj humbën jetën dhe disa të tjerë mbetën të plagosur si pasojë e operacionit.
Pak më parë, Teherani kreu një seri lëshimesh raketash balistike që kishin si ca trupat amerikane të dislokuara në Lindjen e Mesme. Forcat e CENTCOM-it bënë të ditur se arritën të neutralizonin të gjitha raketat në ajër para se ato të mbërrinin në objektiv.
Supozohet se shënjestra e këtij sulmi ishte një instalacion ushtarak amerikan në Jordani. Nga ana e saj, ushtria jordaneze njoftoi se kishte asgjësuar pesë prej raketave dhe se nuk kishte asnjë dëm në njerëz. Këto zhvillime vijnë pas afro dy javësh me bombardime reciproke mes Shteteve të Bashkuara dhe Iranit.
Armëpushimi i negociuar të premten e kaluar kishte si qëllim hapjen e një dritareje për bisedime, por eskaladimi i fundit i dhunës tashmë vë në pikëpyetje perspektivat e paqes dhe rrit ndjeshëm rrezikun e një përshkallëzimi më të gjerë rajonal.
