Autoritetet e futbollit anglez po bëhen gati të zbatojnë rregulla të reja kundër abuzimit të portierëve me trajtimet mjekësore dhe përdorimit të tyre si të ashtuquajtura “pauza taktike” gjatë ndeshjeve.
Udhëzimet e reja përcaktojnë se, sapo gjyqtari të autorizojë hyrjen në fushë të stafit mjekësor për t’i dhënë ndihmë portierit, trajneri do të ketë vetëm 10 sekonda për të zgjedhur një prej lojtarëve që duhet të dalë përkohësisht.
Të lidhura
None found
Futbollisti i caktuar do të mbetet jashtë vijave kufizuese për një minutë. Gjatë periudhës kur portieri trajtohet nga stafi mjekësor, skuadra do të detyrohet të luajë me një lojtar më pak.
Rregullorja përfshin edhe një masë ndëshkuese në rast se ekipi nuk bashkëpunon. Nëse trajneri nuk e përzgjedh lojtarin brenda kufirit prej 10 sekondash, kapiteni i skuadrës do të nxirret automatikisht nga fusha për një minutë.
Vendimi synon t’i përgjigjet një dukurie që është përhapur gjithnjë e më shumë në futbollin modern. Disa portierë qëndrojnë të shtrirë në fushë edhe kur nuk kanë domosdoshmërisht një dëmtim serioz, sidomos në çastet kur skuadra kundërshtare përpiqet të rrisë ritmin e lojës.
Ndërprerje të tilla mjekësore janë shfrytëzuar shpesh për të konsumuar kohë, për t’u mundësuar trajnerëve të japin udhëzime dhe për të ndërprerë hovin e kundërshtarit.
Përmes këtij ndryshimi, drejtuesit e futbollit anglez kërkojnë të sigurojnë rrjedhshmërinë e ndeshjeve, duke kufizuar simulimet dhe shfrytëzimin taktik të pauzave për trajtim mjekësor.
