Një 26-vjeçar është arrestuar nga policia britanike si i dyshuar për vrasjen e ish-ministres konservatore Ann Widdecombe, e cila të enjten u gjet pa jetë në banesën e saj.
Të lidhura
None found
Sipas Policisë së Devon dhe Cornwall, personi i ndaluar është një shtetas britanik i bardhë dhe dyshohet se lidhet me këtë ngjarje. Autoritetet njoftuan se 78-vjeçarja u gjet në shtëpinë e saj me plagë të rënda, ndërsa hetimi po zhvillohet për veprën penale të vrasjes.
Policia ka bërë të qartë se në këtë fazë të hetimeve rasti nuk konsiderohet një akt terrorist dhe se nuk ekziston asnjë e dhënë që të çojë te një motiv politik i krimit.
Vrasja ka sjellë reagime të forta në skenën politike britanike. Kryeministri Keir Starmer e quajti hetimin për vrasje “një lajm tronditës”, ndërsa tha se i dyshuari është “qartësisht një person i rrezikshëm”.
Pas arrestimit reagoi edhe liderja e Partisë Konservatore, Kemi Badenoch, e cila u shpreh se ishte “e tronditur” nga incidenti dhe e përshkroi atë si “të tmerrshëm”.
Ann Widdecombe konsiderohej një prej emrave më të njohur të politikës në Britani. Ajo ishte deputete e Partisë Konservatore për 23 vite, duke përfaqësuar zonën e Maidstone në Kent, dhe më pas mori rolin e zëdhënëses së partisë Reform UK.
Menaxhmenti i saj deklaroi se familja dhe të afërmit kanë përjetuar “24 orë shumë traumatike dhe të dhimbshme”. Në reagimin e parë pas lajmit për vdekjen e saj, nuk u dhanë hollësi për vendin, kohën dhe rrethanat në të cilat ish-ministrja humbi jetën.
Ndërkohë, hetimet vazhdojnë dhe autoritetet britanike janë duke punuar për të sqaruar plotësisht motivin dhe rrethanat e kësaj ngjarjeje që ka tronditur opinionin publik në Mbretërinë e Bashkuar.
