Ministria e Shëndetësisë dhe Mirëqenies Sociale sqaron se nuk është bërë asnjë shkurtim i mjekëve në qendrat shëndetësore apo në spitalet e vendit. Sipas institucionit, lëvizjet e fundit nuk prekin personelin mjekësor dhe as shërbimin që u ofrohet qytetarëve, por lidhen me një riorganizim administrativ të orientuar drejt forcimit të mjekësisë familjare dhe rritjes së cilësisë së shërbimit.
Sa i përket mënyrës së organizimit të Qendrës së Mjekësisë Familjare, që më parë ka qenë Qendra Shëndetësore Nr. 10, MSHMS bën të ditur se mjekët specialistë do të vazhdojnë punën në të njëjtat ambiente dhe do t’i shërbejnë së njëjtës popullatë, ndërsa në aspektin administrativ do të kalojnë në varësi të Qendrës Shëndetësore të Specialiteteve Nr. 1, Tiranë.
Të lidhura
None found
Për qytetarët nuk ndryshon as vendndodhja e marrjes së shërbimit dhe as mjeku që i ndjek. Ky ristrukturim administrativ synon një bashkërendim më të mirë të shërbimeve dhe përmirësimin e kujdesit shëndetësor.
Qendra vijon të funksionojë edhe në bazë të marrëveshjes mes Ministrisë së Shëndetësisë dhe Mbrojtjes Sociale dhe Universitetit të Mjekësisë Tiranë, duke shërbyer si vend praktike për formimin e mjekëve specializantë në mjekësinë familjare.
MSHMS thekson sërish se çdo pretendim për largim apo reduktim të mjekëve nuk qëndron. Ky riorganizim nuk prek aksesin e qytetarëve në shërbimet shëndetësore dhe garanton vazhdimësinë e kujdesit nga të njëjtët mjekë, në të njëjtat ambiente.
