Jo gjithmonë është një konflikt i madh ai që e rrënon një marrëdhënie, por çasti kur respekti, komunikimi dhe përkujdesja nisin të veniten
Të lidhura
None found
Edhe pse çdo martesë kalon periudha të mira dhe të vështira, ka disa sjellje që shumë njerëz i shohin menjëherë si tregues se lidhja vështirë se do të zgjasë. Kjo u pa qartë edhe në një diskutim të gjerë në Reddit, pasi një përdorues ngriti pyetjen: “Cila është shenja e parë se një çift do të divorcohet, edhe nëse ata vetë ende nuk janë të vetëdijshëm për këtë?”
Mijëra reagime pasuan këtë pyetje, ndërsa më shumë u veçuan komentet e atyre që këto sinjale i kishin dalluar nga përvoja personale ose nga puna e tyre, që nga avokatët e divorceve e deri te fotografët e dasmave.
Kur mungon partneri, për të flitet vetëm negativisht
Për shumë komentues, një nga alarmet e para është mënyra se si njëri partner e përshkruan tjetrin kur ai nuk ndodhet aty.
“Nëse çdo bisedë përfundon me atë se sa shumë e nervozon partneri, zakonisht kjo nuk është shenjë e mirë”, shkroi një përdorues.
Sipas kësaj logjike, kur respekti humbet larg syve të partnerit, bëhet thuajse e pamundur që ai të mbetet i paprekur edhe në prani të tij, transmeton Telegrafi.
Mungesa e bisedave për temat kyçe para martesës
Një përdorues solli shembullin e një çifti që u nda më pak se një vit pas dasmës, sepse nuk kishin diskutuar kurrë seriozisht për të ardhmen.
Ajo synonte të kthehej në vendlindje dhe të krijonte sa më shpejt familje, ndërsa ai dëshironte të vazhdonte jetën në qytetin e madh dhe të jetonte pa fëmijë.
“Njerëzit shpesh mendojnë se për këto gjëra do të merren vesh rrugës. Në realitet, pikërisht këto çështje më së shpeshti e shkatërrojnë martesën.”
Heshtja nuk do të thotë domosdoshmërisht qetësi
Një nga komentet që tërhoqi më shumë vëmendje foli pikërisht për këtë dukuri.
“Qetësia ekziston vetëm sepse njëri person ka pushuar plotësisht së thëni çfarë ndien dhe çfarë i nevojitet.”
Nga jashtë, lidhja mund të duket e qetë dhe e rregullt, por shpesh pas kësaj heshtjeje fshihet dorëzimi i njërit partner.
Edhe vetë dasma mund të nxjerrë në pah problemet
Një ish-fotograf dasmash tregoi se gjatë dhjetë viteve punë kishte vërejtur të njëjtin model te shumë çifte.
“Një numër i madh i ish-çifteve që kam fotografuar sot janë të divorcuar. Interesante është se zakonisht këta ishin çiftet për të cilat fotografimi ishte më i rëndësishëm se vetë dasma.”
Një tjetër përdorues solli ndër mend një rast kur një dhëndër i kishte hedhur tortën në fytyrë nuses, ndonëse ajo i kishte kërkuar më parë të mos e bënte.
“Ajo qante në banjë duke u përpjekur ta rregullonte grimin. Ai ishte aq i dehur, sa as nuk e kuptoi çfarë kishte bërë. U divorcuan pas 14 muajsh.”
Partnerët nisin të jetojnë sikur të mos jenë më bashkë
Një nga përgjigjet që u përsërit më shpesh ishte largimi nga jeta e përbashkët e përditshme.
Ai del vetëm me shoqërinë e vet, ajo me të sajën. Nuk i njohin miqtë e njëri-tjetrit, nuk hanë bashkë, flenë në dhoma të ndara dhe rrallë kalojnë kohë si çift.
“Respekti është themeli i çdo lidhjeje. Kur ai zhduket, martesa tashmë ka vdekur, vetëm se ata ende nuk janë të vetëdijshëm për këtë.”
Avokati i divorceve veçoi çështjen e parave
Mes komenteve që morën vëmendje të madhe ishte edhe ai i një avokati që prej 18 vjetësh merret me të drejtën familjare.
“Çifti që nuk mund të flasë hapur dhe sinqerisht për paratë nuk do të mbetet në martesë. Këtë e kam mësuar gjatë 18 viteve praktikë.”
Sipas përvojës së tij, financat mbeten një nga arsyet më të zakonshme që i largojnë partnerët nga njëri-tjetri.
Një përdorues tjetër e përmblodhi të gjithë këtë marrëdhënie me një fjali të vetme:
“Njëri partner bëhet prind, ndërsa tjetri edhe një fëmijë më shumë.”
Sipas shumë pjesëmarrësve në debat, një dinamikë e tillë me kalimin e kohës e dëmton tërheqjen dhe sjell shumë frustrim.
Debatet nuk bëhen më për të kuptuar, por për të fituar
Njerëzit theksuan edhe një model tjetër që shpesh kalon pa u vënë re.
“Kur gjatë zënkës e kuptoni se partneri nuk po përpiqet më t’ju kuptojë, por vetëm dëshiron të fitojë.”
Në atë pikë, synimi nuk është më zgjidhja e problemit, por thjesht prova se kush ka të drejtë.
Edhe pushimet përfundojnë në konflikt
Shumë prej tyre thanë se një udhëtim i përbashkët tregon qartë gjendjen reale të çiftit.
“Nëse nuk mund të shkojnë mirë as në pushime, vështirë se do të shkojnë mirë në jetën e përditshme.”
Rrjetet sociale përdoren për të fshehur problemet
Disa komentues vunë re se çiftet që përpiqen pa pushim të tregojnë në rrjetet sociale sa të lumtur janë, shpesh përballen me vështirësi të mëdha larg kamerës.
“Përpiqen tepër t’u tregojnë të gjithëve një jetë të përsosur.”
Kur batutat për divorc fillojnë të tingëllojnë serioze
Një nga përgjigjet që la më shumë përshtypje ishte edhe kjo.
“Nëse vazhdimisht bëjnë shaka për divorcin, herët a vonë dikush nuk do të jetë më duke bërë shaka.”
Në fund, shumë përdorues ranë dakord se ekziston edhe një shenjë tjetër që rrallëherë gabon.
“Apatia.”
Sepse, siç theksuan shumë prej tyre, në shumicën e rasteve martesën nuk e shkatërron një përplasje e madhe, por momenti kur njëri prej partnerëve nis të mos ndiejë më asgjë dhe gjithçka i bëhet njësoj.
