Banorët e një zone të gjerë në Oreokastro, në periferi të Selanikut, po përjetojnë një natë të rëndë në përballje me zjarrin, ndërsa dhjetëra banesa janë evakuuar.
Të lidhura
None found
Vatra e zjarrit u shfaq rreth orës 20:30 të mbrëmjes së të shtunës në një sipërfaqe agro-pyjore të Oreokastros, duke sjellë një gjendje tepër kritike. Të ndihmuara nga erërat e forta, flakët u përhapën me shpejtësi dhe gjatë gjithë natës forca të shumta zjarrfikëse po përpiqen të ndalin avancimin e tyre drejt zonave të banuara.
Sipas autoriteteve, zjarri është aktiv në dy fronte kryesore, ndërsa ka edhe disa vatra të shpërndara, të cilat rrezikojnë banesa, biznese dhe objekte industriale.
Në këtë rajon gjenden magazina, punishte dhe fabrika, ku disa prej tyre mbajnë materiale lehtësisht të ndezshme. Gjatë natës janë dëgjuar shpërthime, ndërsa një fabrikë me magazinat përkatëse u dogj plotësisht. Raportohet po ashtu se ndërtesa të tjera në zonë kanë pësuar dëmtime të pjesshme.
Përhapja e zjarrit u ndihmua nga erërat veriore me intensitet deri në 6 ballë, të cilat ndryshonin vazhdimisht drejtim, duke u krijuar vështirësi të mëdha ekipeve zjarrfikëse. Ndërkohë, re të dendura tymi janë shtrirë mbi Selanik.
Zjarrfikësit kanë theksuar se ky është një zjarr shumë i rrezikshëm, për shkak se ka rënë shumë pranë zonës urbane të Selanikut. E shtuna ishte një ditë me rrezik shumë të lartë për zjarre në shumë pjesë të vendit, ku janë regjistruar më shumë se 60 vatra.
Operacioni mbetet në zhvillim, pasi zjarri ende nuk është vënë nën kontroll. Në terren ndodhen mbi 120 zjarrfikës, 5 grupe këmbësore speciale, 38 automjete zjarrfikëse, autobote dhe makineri të Rajonit të Maqedonisë Qendrore, si edhe shumë vullnetarë. Deri në perëndim të diellit mori pjesë edhe një avion zjarrfikës, por pas rënies së natës mjetet ajrore u tërhoqën.
Në orën 20:52, autoritetet dërguan një alarm emergjent përmes numrit 112, duke u kërkuar banorëve të Anthoupolit të largohen menjëherë. Një nga çastet më të vështira të natës ishte edhe vendimi për evakuimin e 157 personave që ndodheshin në Institucionin e Sëmundjeve Kronike “Shën Panteleimoni”, në Derveni, pranë autostradës Egnatia, përballë fabrikës “Titan”.
Më pas, flakët po lëviznin drejt jugut, në drejtim të Evkarpias, një tjetër lagje e madhe në perëndim të Selanikut. Situatën si dramatike e cilësoi edhe kryetari i bashkisë fqinje Pavlou Melas, Dimitris Aslanidis.
Në vendngjarje mbërriti menjëherë edhe Njësia Hetimore për Krimet e Zjarrvënies. Në kuadër të hetimeve është shoqëruar një 76-vjeçar grek.
