Tre sulme të koordinuara me zjarrvënie goditën në orët e para të së mërkurës në Selanik, duke lënë të plagosur pesë persona. Mes tyre ndodhet një grua në gjendje kritike, e cila është intubuar.
Të lidhura
None found
Objekt i këtyre sulmeve ishin shtëpitë e tre drejtuesve të partisë greke Demokracia e Re (ND).
Sipas autoriteteve, të tre episodet ndodhën në një interval më të shkurtër se 20 minuta, ndërsa dyshimet janë se autorët lëviznin me motoçikleta. Hetimi i çështjes i është besuar Shërbimit të Antiterrorit, i cili po verifikon mundësinë që bëhet fjalë për një skenar të organizuar.
Ngjarja më e rëndë u shënua në zonën Harilaou, rreth orës 04:35. Aty, një zjarr i shkaktuar nga një bombol gazi u përhap me shpejtësi dhe përfshiu dy automjete dhe dy motoçikleta. Njëri prej automjeteve ishte në pronësi të politikanes Aphrodite Nestora.
Si rezultat i flakëve, nëna 70-vjeçare e Nestorës mori djegie të rënda në të gjithë trupin dhe po trajtohet e intubuar në Njësinë e Kujdesit Intensiv të spitalit “Ippokrateio”. Aphrodite Nestora pati djegie të lehta në gjymtyrë, ndërsa babai i saj dhe dy banorë të tjerë të pallatit u transportuan në spital për shkak të vështirësive në frymëmarrje të shkaktuara nga tymi.
Zjarri shkaktoi edhe dëme të mëdha materiale, duke shkatërruar dy automjete dhe dëmtuar dy motoçikleta.
Disa minuta më parë, rreth orës 04:23, një sulm tjetër u regjistrua në zonën Tumba. Persona të paidentifikuar vendosën një bombol gazi në hyrje të pallatit ku jeton ish-deputeti Savvas Anastasiades. Nga shpërthimi u dëmtua hyrja e godinës, u thyen xhamat dhe u prek fasada, por nuk pati persona të lënduar.
Sulmi i parë ishte shënuar në orën 04:18 në Pylaia, ku një bombol gazi u vendos dhe u aktivizua pranë një ndërtese që më herët kishte qenë banesa e kryetarit të Komitetit Drejtues të Demokracisë së Re në Selanik, Zisis Ioakimoviç. Në këtë rast nuk u raportuan as dëme materiale dhe as të lënduar.
Autoritetet greke po shqyrtojnë pamjet e kamerave të sigurisë dhe prova të tjera për të identifikuar autorët. Hetimet janë përqendruar te mundësia që të tre sulmet të kenë qenë pjesë e një operacioni të mirëorganizuar kundër figurave të partisë në pushtet.
