Sevastopoli, qyteti më i madh në Krime, ka mbetur pa energji elektrike pas një sulmi ajror ukrainas që goditi rrjetin energjetik në gadishullin e pushtuar nga Rusia, sipas autoriteteve të vendosura nga Moska.
Mikhail Razvozhayev, guvernatori i emëruar nga Rusia, deklaroi se gjatë natës dronët ukrainas kanë goditur një nënstacion kryesor të energjisë, çka ka sjellë ndërprerje të mëdha të furnizimit me rrymë. Ai paralajmëroi se në disa zona mungesa e energjisë mund të zgjasë deri të mërkurën në mbrëmje.
Të lidhura
None found
Edhe Ukraina e ka pranuar kryerjen e këtij sulmi, duke sqaruar se në shënjestër ishte infrastruktura energjetike që përdoret nga forcat ruse në Krime.
Burime ushtarake ukrainase bëjnë të ditur se dronët kanë goditur disa objektiva në rajon, mes tyre zona ushtarake dhe infrastrukturë tjetër në Krime, përfshirë Bakhchisarai, Kerç dhe zonën e malit Ai-Petri.
Përballë situatës, autoritetet vendore kanë aktivizuar masa emergjente në rrjetin energjetik dhe u kanë kërkuar qytetarëve të reduktojnë konsumin, duke kufizuar edhe përdorimin e telefonave dhe pajisjeve elektrike. Banorët janë këshilluar gjithashtu të kujdesen për fqinjët e moshuar, ndërsa temperaturat shkojnë rreth 30°C.
Sulmet e fundit e kanë rënduar më tej gjendjen e furnizimit në gadishull, ku tashmë raportohen mungesa karburanti dhe kufizime në shitje, ndërkohë që autoritetet kanë pezulluar pjesërisht furnizimin për qytetarët.
Krimea, e aneksuar nga Rusia në vitin 2014, vazhdon të jetë një nga pikat më të ndjeshme të konfliktit, teksa Ukraina ka shtuar sulmet ndaj infrastrukturës strategjike në territoret që kontrollohen nga Rusia.
