Bashkimi Evropian po analizon mundësinë e vendosjes në Liban të një misioni ushtarak dhe politik me kohëzgjatje trevjeçare, që do të kishte si synim trajnimin dhe këshillimin e forcave të sigurisë të vendit, sipas një dokumenti të parë nga Reuters.
Nisma është përgatitur nga shërbimi diplomatik i BE-së pas një vlerësimi mbi mënyrat se si mund të forcohen Forcat e Sigurisë së Brendshme të Libanit, në mënyrë që ushtria libaneze të mund të përqendrohet më shumë te çarmatosja e Hezbollahut.
Të lidhura
None found
Sipas dokumentit të datës 17 qershor, i cili u është shpërndarë shteteve anëtare të BE-së, misioni do të niste me një mandat fillestar prej tre vitesh dhe do të ndihmonte autoritetet libaneze në rritjen e kontrollit territorial dhe të sigurisë kufitare, përmes zgjerimit të kapaciteteve të ushtrisë dhe policisë.
Dokumenti përfshin mbështetje për regjimentet kufitare tokësore, forcat mobile dhe njësitë rajonale të xhandarmërisë, si edhe përmirësimin e kapaciteteve për inteligjencë, mbikëqyrje dhe zbulim. Po ashtu, misioni do të përqendrohej te forcimi i sigurisë detare, administrimi i kufijve dhe mbrojtja e porteve.
Debati për një mision të mundshëm evropian zhvillohet në një periudhë kur mandati i Forcës së Përkohshme të OKB-së në Liban, UNIFIL, pritet të përfundojë në fund të vitit 2026, ndërsa më pas parashikohet të nisë një proces tërheqjeje që do të zgjasë një vit.
Megjithatë, realizimi i një misioni të tillë do të varej nga miratimi i të 27 vendeve anëtare të Bashkimit Evropian.
Ky propozim del në një moment të ndërlikuar për sigurinë në jug të Libanit, ku trupat izraelite vijojnë të qëndrojnë pas përplasjes së fundit me Hezbollahun. Luftimet nisën pasi grupi libanez hapi zjarr ndaj Izraelit në mbështetje të Iranit, vetëm pak ditë pas sulmeve amerikane dhe izraelite kundër Teheranit.
Ndonëse armëpushimi i shpallur ndërmjet Izraelit dhe Hezbollahut në fund të javës së kaluar është respektuar kryesisht që prej së dielës, ushtria izraelite vazhdon të mbajë pozicione në disa pjesë të Libanit jugor, duke theksuar se kjo prani është e domosdoshme për mbrojtjen e zonave veriore të Izraelit nga sulme të mundshme të Hezbollahut.
