Presidenti i Iranit, Masoud Pezeshkian, ka deklaruar se fati i marrëveshjes kornizë mes Teheranit dhe Uashingtonit do të përcaktohet nga mënyra se si të dyja palët do të zbatojnë në mënyrë të plotë dhe të saktë angazhimet e marra.
Përmes një reagimi të publikuar në rrjetin social X, Pezeshkian nënvizoi se rezultatet e negociatave do të maten nga respektimi konkret i detyrimeve të dakordësuara. Ai shtoi se deklarimet që shkojnë përtej përmbajtjes së marrëveshjes nuk ndihmojnë përparimin e procesit diplomatik.
Të lidhura
None found
Kjo deklaratë u bë një ditë pas bisedimeve të mbajtura në Zvicër, ku përfaqësuesit negociues të SHBA-së dhe Iranit shfaqën optimizëm për rrjedhën e dialogut. Megjithatë, të dyja palët kanë dhënë mesazhe të ndryshme sa i përket rikthimit të inspektorëve të Agjencisë Ndërkombëtare të Energjisë Atomike në objektet bërthamore iraniane.
Nga ana tjetër, presidenti iranian pritet të kryejë një vizitë zyrtare në Pakistan, një vend që gjatë muajve të fundit ka pasur një rol të rëndësishëm ndërmjetësues në kontaktet mes SHBA-së dhe Iranit.
Këto negociata kanë si objektiv gjetjen e një zgjidhjeje diplomatike afatgjatë për tensionet ndërmjet dy vendeve, si edhe stabilizimin e situatës në rajon.
