Keir Starmer ka bërë të ditur dorëheqjen e tij nga posti i kryeministrit të Mbretërisë së Bashkuar, njëkohësisht edhe nga drejtimi i Partisë Laburiste.
Ai njoftoi se për këtë vendim ka vënë në dijeni edhe Mbretin, ndërsa i ka kërkuar Komitetit Ekzekutiv Kombëtar të laburistëve të caktojë kalendarin për zgjedhjen e pasardhësit. Sipas planit të bërë publik, nominimet do të nisin më 9 korrik dhe i gjithë procesi pritet të mbyllet përpara pushimit veror të parlamentit.
Të lidhura
None found
Kjo, sipas Starmer, nënkupton se lideri i ri do të marrë detyrën para se parlamenti të rikthehet në shtator. Deri në atë moment, ai theksoi se do të vazhdojë të ushtrojë funksionin e kryeministrit.
Starmer premtoi gjithashtu se kalimi i pushtetit do të zhvillohet në mënyrë të rregullt dhe u shpreh se do t’i japë mbështetje të plotë pasuesit të tij. Ai deklaroi se kreu i ardhshëm do të marrë në dorë një Britani “më të fortë dhe më të drejtë” sesa ishte dy vite më parë.
Përpara se të shpallte largimin, Starmer tha se kishte marrë në dorë një Parti Laburiste që, sipas vlerësimit të tij, ishte “politikisht, financiarisht dhe moralisht e falimentuar”. Ai kujtoi se i ishte thënë vazhdimisht se partia ishte “e mbaruar”, por nënvizoi se ai i ka “provuar këta njerëz gabim”.
Më tej, ai deklaroi se gjatë kohës në krye të partisë ka arritur ta transformojë atë, duke “çrrënjosur helmin e antisemitizmit” dhe duke rikthyer besimin te ekonomia, mbrojtja dhe siguria kombëtare.
Në përmbyllje, Starmer shprehu mirënjohje për bashkëpunëtorët e tij, stafin e Downing Street dhe shërbimin civil për punën dhe mbështetjen e dhënë gjatë gjashtë viteve të fundit.
