Një sulm ajror rus mbi Kharkiv, në verilindje të Ukrainës, i ka marrë jetën të paktën një personi dhe ka lënë të plagosur nëntë të tjerë.
Sipas autoriteteve vendore, goditjet ranë mbi një zonë të banuar të qytetit, duke shkaktuar dëme të mëdha në ndërtesat e banimit.
Të lidhura
None found
Kryebashkiaku i Kharkivit deklaroi se ekipet e emergjencës, gjatë operacionit të kërkim-shpëtimit, nxorën trupin e një burri nga rrënojat e një ndërtese të shembur.
Autoritetet ukrainase thanë gjithashtu se nga ky sulm kanë mbetur të plagosur të paktën nëntë persona, ndërsa forcat e shpëtimit vazhduan kontrollin në zonën e goditur.
Në anën tjetër, Ministria ruse e Mbrojtjes bëri të ditur se sistemet e saj të mbrojtjes ajrore kanë rrëzuar gjatë natës 187 dronë ukrainas në rajone të ndryshme të vendit, mes tyre edhe në rajonin e Moskës.
Përplasjet e ndërsjella midis Rusisë dhe Ukrainës vijojnë të sjellin viktima dhe dëme në të dy shtetet, ndërsa lufta e nisur në vitin 2022 ende nuk ka një zgjidhje diplomatike të afërt.
